Ulloq 20. august 2019, Qaanaami piniartut innuttaasullu akerliussutsimik takutitsinermik ingerlatsipput. Akerliussutsimik takutitsinerup naqissuserpaa, taavani avannaarsuani, piniartutut inuuniuteqarnerup qanoq ulluinnarni inuuniarnikkut qitiulluinnartigalunilu pingaaruteqartiginera. Taamatullu qisuariaateqarneq Avannaata Kommuniata tungaanit paasilluinnarlugu matumuuna tapersiinerput oqariartuutigaarput.
Taavani piniartut, Qaanaami Savissivimmilu qilaluartassat ilaneqarnissaannik, qinnuteqaatigisartagaat, Avannaata Kommuniani Aalisarnermut Piniarnermullu Ataatsimiititaliap tungaanit tunngavilersuuteqarnikkut taperserlugit oqariartuuteqartoqartaraluartoq qinnuteqaatit maannamut tamarmik itingartinneqarput.
Qaanaami eqqaanilu, pisortat suliffeqarfiutaat eqqaassanngikkaanni, aningaasarsiorfittut neqissaqarniarnikkullu pingaarnertut oqaatigisariaqartoq tassaavoq piniartutut inuuniuteqarneq. Ameerniarneq taavani periarfissaanngilaq, tamanna akilersinnaasumik ingerlanneqarsinnaanngimmat. Aasakkut ukiaaneranilu imaanerata nalaani aalisarnikkut inuuniuteqarsinnaaneq periarfissaaneq ajorpoq, piffissani taakkunani qilalukkat qernertat augustimi qaqortallu oktoberimi nalliusimaartarmata. Aatsaallu novemberimi decemberimiluunniit sikoreernerani, qaleralinniarnikkut, killeqaraluartumik aningaasarsiorsinnaaneq periarfissaasarluni.
Taavani qilaluaq tassaavoq, piniartunut kisimi pinnani, aammali innuttaasunut ukioq kaajallallugu, aningaasarsiorfiusinnaasunik allanik periarfissarissaarpallaanngitsumi, patajaannerusumik aningaasaqarsinnaanikkut neqissaqarniarnikkullu tunngaviliisuulluartartoq.
Ilisimavarput taavani, qangaaniilli piniariaatsimik attataqarnermikkut nungusaataanngitsumik qilaluarniarnermik inngerlataqartuusut. Aammalu periusitoqqatik atorlugit ukiumut peqqu-maatissatut neqissaqarfigilluartaraat.
Massakkut ukiut siuliini naleqqiullugu sila unerisimanerusoq aammalu qilalukkat amerlanaarlutik takkusimaartut, piniartut tungaanniit oqariartuutigineqarpoq. Avannaatalu Kommuniata tungaanit aarleqqutigisarput unaavoq, taavani immikkut pisassiisoqanngippat, kiisalu qilalukkat qaqortat oktoberimi aatsaat takkusimaalernissaasa tungaannut, piniartut aningaasarsiorfeqarsinnaanerat annertuumik killilerneqartussaammat. Tamannalu taavani innuttaasunut sunniuteqarnerluttussaavoq.
Tamanna tunngavigalugu Avannaata kommuniata tungaaniit Qaanaami eqqaanilu piniartut qilalukkanik qernertanik immikkut 45-nik aammalu ukiup tullianut ilanngaataanngitsumik pisasinneqarnissamik qinnuteqaataat matumuuna nalilersoqqinneqassasoq ilungersortumik oqariartuutigaarput.
Inussiarnersumik inuulluaqqusilluta
Avannaata Kommunia sinnerlugu
Palle Jerimiassen & Jakob Petersen
Borgmesteri Ataatsimiititaliami siulittaasoq
