- Pingaartumik kommunimi sumiiffiit ilaanni pissutsit assigiinngiiaarnerat aammalu qimminut akiiuussutissalersuisartunut nakkutiliisunullu ajunngitsorsiassaqartitsinikkut assigiinngitsunik atugassaqartitaaneq ilaatigut pissutigalugu qimmit tamarmik qaammatinik pingasuleereersimasut inatsisitigut akiuussutissalersuisussaatitaanerup aammalu qimminik angalaannartunik toqoraasarnerup tungaatigut eqquutsinniartarnerup akimmiffeqartarnera miserratissaanngilaq. Sumiiffiit ilaanni aalisariarsinnaaneq qimminik angalaannartunik pisaqarniarnermut, toqoraanermut isumannaatsumillu isumaginninnissamut sanilliullugu imminut akilersinnaaneruvoq, Anthon Frederiksen Avannaata Kommuniani qimmilerisunut ataqatigiissaarisoq oqarpoq nangillunilu:
- Kommunimi taama isorartutigisumi atukkatigullu assigiinngisitaarfiutigisumi akitigut assigiissaariniarneq imaannaanngitsuuvoq. Assersuutigalugu Ilulissani eqqaanilu qimminik angalaannartunik toqoraasarneq inatsisitigullu akiuussutissalersuisussaatitaaneq naammaginartorujussuarmik ingerlanneqarpoq, tassa suliassat taakku kommunip sulisuisa suliassaannut ilaatinneqaramik. Sumiiffinnili allani ingerlalluannginneruvoq, pingaartumik nunaqarfiit ilaanni pisariaqartitsineq naapertorlugu suliassaqarfiusartuni akiuussutissalersuisunik akuerisanik pissarniarfigiuminaatsuni. Qujanartumilli tamatuma tungaatigut iluarsiiniarneq sulissutigineqarpoq, kommunalbestyrelsimilu ilaasortat taakkuupput allannguinissamut aalajangiisussaasut.
Taamaakkaluartorli Anthon Frederiksen qimmilerisunut tamanut ilaatigut sulinerup tungaatigut pitsaanngissinnaasunik atugassaqartitaasunut nersualaarinnippoq.
Qimmeq ataasiinnarluunniit annaanngilaa
Qimuttut 10.000-it missaanniittut kommunip qarasaasiatigut nalunaarsuiffiani nalunaarsorneqarsimasut tamarmik immikkut amitsukujuumik mikisunnguamik paasissutissanik katersuiffiusinnaasumik ikkussuiffigineqarsimapput, tassanilu qimmit piginnittaasalu paasissutissartaat, akiuussutissanik sorlernik kapineqarsimanerat amigaateqarneralluunniit allallu nalunaarsorneqartarput. Nalunaarsuiffik imartoorujussuaq pingaarutilillu, pingaartumik qimmiutillit nutartereqataaffigissallugu pisussaaffeqarfigaat. Qimmiutillit ilaat inatsisitigut akiuussutissalersuinissaq suli eqquutsikkuminaatsittarpaat. Tamannali qimmiutilimmit akiuussutissalersuinermik pimoorussisumit aqqutissaasorineqanngilaq.
- Akiuussutissalersuinermik maleruagassat naapertorlugit qimmiaqqat pingasunik qaammateqaleraangata akiuussutissanik kapitinneqartarnerat aallartinneqartussaavoq. Uanga qimmikka marlunnik qaammateqaliinnaraangata kapiteqqaartarpakka, misilittakkakkami tunngavigalugit qimmiaqqat taama utoqqaatigileraangamik nappaatinit, soorlu parvovirusinit sunnerneqajasuaraasarput. Akiuussutissalersuinissamut maleruagassat malinnissaat pingaarutilerujussuuvoq, uangalu nammineq maleqqissaarniartarpakka. Taamaattumillu aamma ukioq 2000 aallartilaartoq kingullermillu 2015-imi qimmit nappaalammata qimminni ataasiinnarmilluunniit annaasaqanngilara, Ville Siegstad Avannaata Qimussersuani nunatsinni pissartanngorniuttarnerni ukiorpanngortuni pissartaasarsimasoq unnersiorpoq.
Uumasut nakorsaat kommunillu qimmilerisunut ataqatigiissaarisua ilaatigut qimminik paarinerlutanik siumuisinnaasarput. Taama pisoqartillugu qimmiutillit allagarsiinikkut pisussaaffimminnik nakkutiginninnerunissaat kaammattuutigineqartarpoq. Qimminut inatsit naapertorlugu qimmit ullut tamaasa imissaqartinneqarlutillu nerukkaasersorneqartartussaatitaapput aammalu panertunik sumiiffissaqartitaasussaatitaallutik. Maleruagassat arlaleriarluni unioqqutissimagaanni qimuttunik peqaqqusaajunnaarnermik kinguneqarsinnaavoq.
- Nammineq inuttut nalunngilarput imerusuleraangatta perlileraangattalu qanoq iluaalliornartigisarnersoq. Taamatuttaaq qimmit imissaqartinneqaratillu nerukkaasersorneqarneq ajortut atugaqartarput. Qimmiutillit ilaqaramik qangali periutsit malillugit aasaanerani perlimoortitsisartunik. Uanga nammineq qimmikka aasaagaluartumiluunniit nerukkaasersorluarlugit pualasuutikkusuttarpakka, tassami nappaatinut akiuussutissaqarnissaannut pingaaruteqarmat, Ville Siegstad oqarpoq.
Avannaata Kommunia qimminut inatsit ukiup ingerlanerani atuutilersinniarlugu suliniutissatut pilersaarummik 2018-imi atuutilersitsivoq.
