airplanebooksbriefcase business cogs cross election entertainment fish house law lockmedicalpeopleselfservices socialtax

Borgmesterip aalisartut iliuuseqarnerat nersualaarpaa

12. september 2019

Avannaata Kommuniani borgmesterip Palle Jerimiassenip Ilulissani aalisartut aalisarnermi atortunik annaasanik nammineq iliuuseqarlutik qalluilermata nersualaarpai. 

- Ilulissani aalisartut piniartullu peqatigiiffiani ilaasortat namminneq iliuuseqarnermikkut aalisaatinik annaasanik qalluilermata nuannerpoq. Taamatut iliuuseqarnerat aalisarnermut nunatsinni inuussutissarsiutini pingaarnersaasumut iluaqutaaginnartussaavoq, Palle Jerimiassen Avannaata Kommuniani borgmesteri oqarpoq.

Borgmesteri isumaqarpoq, aalisartut akisussaaqataanertik ersersillugu aalisarnermi atortunik annaasanik ajornartorsiuteqarneq namminneq iliuuseqarfigigaat.

- Aalisarnermi atortunik annaasanik qalluinikkut aalisartitseqatigiiffiit Halibut Greenland aamma Royal Greenland suleqatigilluarsimavagut. Allisarnermi atortunik annaasat assigiinngitsutigut ajornartorsiutaapput. Qassutit aalisakkanik pisaqartuarsinnarput aammalu aalisaatit plastikimit sanaajusut mingutsitsisuullutik. Taamaammat aalisartut pisortaqarfinnik, soorlu kommunimik imaluuniit Namminersorlutik Oqartussanik utaqqiinnaratik, namminneq iliuuseqarnerat nuannaarutissaalluarpoq, Palle Jerimiassen oqarpoq.

Palle Jerimiassenip qassutinik nalunaarsutaasalinnik pilersuinissamik pilersaarutit isumalluarfigai, nalunaarutaasalersuinikkummi aalisarnermi atortut annaasat siunissami nassaariuminarnerulissapput.

Kommunimi aalisartut tamarmik aalisarnermi qassutinik killilersimaarinninnissaannik siunnersuut kommunalbestyrelsimi eqqartorneqaqqammersoq maanna tusarniaassutigineqarpoq.