Naalakkersuisut Kalaallit Nunaanni ilinniagaqartarneq annertusarniarlugu aalajangiipput illoqarfinni ilinniarfeqarfiusuni tallimani ilinniartut inaannik nutaanik sanaartortoqassasoq – ilaatigut Ilulissani. Tamanna tunngavigalugu kommunimut tapiliussaq una suliarineqarpoq.
Illoqarfiup qeqqanut siunertanut Kommunip pilersaarutaanut tapiliut nr. 4-imut siunnersuut tamanut ammasumik tusarniaassutitut saqqummiunneqarpoq, piffissami: 13.09.2019-imit 08.11.2019 tikillugu ilanngullugulu.
Kommunip pilersaarutaata tapiata siunertaa:
Kommunimut pilersaarummut tapiliussami uani siunertaavoq sanaartukkanut pioreersunut nunallu pissusaa ataqatigiissitsilluni nutaanik sanaartornissap qulakkeerneqarnissaaq immikkoortortallu pisortat sulisoqarfiinut, kulturimut sunngiffimmi sammisaqarfittut, ilinniartut inaannut inissianullu atorneqarnissaata qulakkeerneqarnissaa.
Pilersaarummi Namminersorlutik Oqartussat ilinniartut inaannik sanaartornissamik pilersaarusiaat piviusunngortinneqassaaq, tamaalilluni Namminersorlutik Oqartussat sunik sanaartortoqarnissaanik aalajangiinerannut naapertissalluni. Pilersaarummi aamma inissianik imminnut qanittunik pukkitsunillu nutaanik sanaartorfissaqartitsisoqarpoq, taamaalilluni Ilulissani inissaqartitsineq annertunerulissalluni assigiinngiiaarnerulissallunilu
Kommunimut pilersaarummut tapiliussaq sapaatip akunnerini arfineq-pingasuni sivisussuseqartumik tusarniutigineqassaaq. Piffissami tassani kikkulluunniit – innuttaasut, suliffeqarfiit, ingerlatsiviit, peqatigiiffiit allallu – akerliunerminnik, oqaaseqaatinik kiisalu allannguutissatut siunnersuutinik saqqummiussaqarsinnaapput.
Tusarniutaasumut akissutit kommunep nittartagaanut toqqaannartumik nassiussinnaavat uunga: http://kommuneplania.avannaata.gl/dk/hoering/hoering/ imalt.mailikkut uunga: plania@avannaata.gl. Aamma tassani ilanngussassatit kakkiussinnaavatit. Taamaattorli suli akissuteqaatit najukkanni Sullissivimmut imalunniit Kommunimut nassiussinnaavat.
Tamanik tusarniaasoqareerpat akerliussutaasinnaasut imaluunniit allannguutissatut siunnersuutaasinnaasut kommunalbestyrelsimit suliarineqassapput, tamatumalu kingorna siunnersuut inaarutaasumik akuersissutigineqassaaq.
Tusarniaanermut akerliunissamut pissutissaqaruit imaluunniit oqaaseqaatissaqaruit, taakku kingusinnerpaamik kommunimit tiguneqareersimassapput ulloq 08.11.2019.
Kommunip pilersaarutaanut tapiliut uani takuuk: KPT4.pdf