Uummannami erngup mingutsinneqarnera pillugu innuttaasunut sapaatiummat paasissutissiineq Uummannami innuttaasunut paatsiveerusimaanermik kinguneqaannarpoq, aammalu innuttaasunut Avannaatalu Kommuniani oqartussaasunut paasissutissiinerit imminnut naapertuutinngillat.
- Ippassaq Uummannami innuttaasunut paasissutissiisoqareersorlu innuttaasut Avannaata Kommunianut saaffiginnipput. Innuttaasut paasissutissiineq naammaginngisimaaqaat misigisimappullu paasissutissiinermi innuttaasunik nipangersaasoqarniaannartoq apeqqutitillu iluamik akineqarsinnaasimanngitsut. Assersuutigalugu innuttaasut ilisimatitsipput imeq uuliasunneqisoq, illua-tungaatigullu Nukissiorfinniit kaammattuutigineqarpoq imeq eqqiaanermut errorsinermullu atorneqarsinnaasoq. Tamanna atorsinnaanngilaq, Palle Jerimiassen, Avannaata Kommuniani borgmesteri oqarpoq nangillunilu:
- Avannaata Kommunianut saniatigut paasissutissiinerit eqqaassagaanni nakorsaanermit aammalu Nukissiorfinniit paasissutissiinerit ajoraluartumik imminnut naapertuutinngitsut oqaatigiinnarsinnaavarput. Taamaammat Inuussutissarsiornermut, Nukissiuuteqarnermut Ilisimatusarnermullu Naalakkersuisoq Jess Svane aamma nakorsaaneq Uummannaliarlutik assigiinnik nassuiaateqariartortariaqarput.
Imermik imigassamik 5.000 literimik kommunimit namminerisamik Uummannamut assartuussisoqartitsereerpoq aammalu innuttaasut nilattarlutik imigassaqarnissaat kaammattuutigineqarluni. Dunkinik imertaataasinnaasunik aamma kommuni assartuisitsivoq.
Avannaata Kommunia Uummannami atuarfimmik, meeqqeriviutigalunilu meeqqerivimmik, atuareernerup kingorna ornittakkamik aamma elevhjemimik matoqqatitsigallarpoq. Suliffeqarfinnillu taakkuninnga matoqqatitsinissaq ullut tamaasa nalilersorneqartarumaarpoq.
- Tamatuminnga peqquteqartumik angajoqqaat ilaat angerlarsimallutik qitornaminnik paarsisariaqalersinneqarput. Tamatumalu saniatigut tunisassiorfiit matoqqatinneqarnerisa kingunerisaannik aalisartut pisaminnik tunisisinnaajunnaarsinneqarput. Illoqarfimmi ilungersunartorsiorneq pissutigalugu Naalakkersuisut umiarsuarmik tunitsiviliinissaat taamalu minnerpaamik aalisartut pisaminnik tunisisinnaalernissaat kommunimi oqartussaasunit kissaatigaarput, borgmesteri Palle Jerimiassen oqarpoq.