airplanebooksbriefcase business cogs cross election entertainment fish house law lockmedicalpeopleselfservices socialtax

Nersualaarinninnerit iliuuseqarusussuserlu FN-ip utoqqarnut ulloqartitsinerani

1. oktober 2019

FN’ip utoqqarnut ulloqartitsinera malunnartinniarlugu illoqarfimmi utoqqaat piorsarsimassutsikkut illorsuarmi Sermermiuni ullaakkorsiortinneqarmata iliuuseqarusussuseqarneq qiimanerlu malunnarput. Oqalugiartut tamarluinnarmik kommunip ullormik ullaakkumiit unnummut malunnartitsiniaanera pillugu nersualaarinnipput. Borgmesterillu politikerit neriorsuutiminnik eqquutsitsinngikkaata utoqqaat naveersilaartarnissaannik kaammattorpai.

Ilulissani utoqqaat ulloq naallugu ulloqartinneqarnerat pillugu kommunip suliniuteqarnera nersualaarneqarluarpoq. Naak kommunip Peqqinneq Sunngiffillu pillugit immikkoortortaqarfia ukioq missiliuinnarlugu atasimagaluartoq innuttaasunut sammisassaqartitsiniartarnera takussutissaqarlualereersutut utoqqaat peqatigiiffiannit, utoqqaat timersoqatigiiffiannit aammalu utoqqaat illuata ningiuanit nuannaarutigineqarluni unnersiutigineqarpoq.

Borgmester Palle Jerimiassenip periarfissaq iluatsillugu FN-ip nunarsuaq tamakkerlugu anguniagassiaanik kommunip suliniuteqalerniarnera ilisimatitsissutigaa, aamma utoqqarnut tunngatillugu.

- Ukioq 2020 atussavarput siunnerfiit pillugit innuttaasut tamaasa peqataatillugit oqallinnikkut oqallissaarinertigullu anguniagassaliornissatsinnut. Ukioq 2021-mi missingersuusiornissatsinnut aningaasartalerlugit ilaatilernissaat siunnerfigaarput. Taamaattumik utoqqaat ilissi aamma peqataalluarnissassinnik kissaappassi, Palle Jerimiassen Avannaata Kommuniani borgmesteri oqarpoq, assersuusiorporlu:

- Illoqarfimmi utoqqartut pisariaqartittarsimasassinnik issiavilersuinissaq siornatigut kissaatigisimavarsi. Kommunimit tusaaniarneqarlusi suliffissaaleqisut suleqatigalugit issiavissanik qalipaatigissunik sanasimavugut. Ungasissorsuunngitsukkullu umiarsuaq tikeriarpat amerlanernik issiavissaqalerumaarpoq. Takusinnaavarsi kommunimit aamma tusaaniartoqarsinnaasartoq. Taamaattumik ajorissanngilarput neriorsuutitsinnik ilaatigut eqquutsitsinngikkaangatta naviilaartaluarutsigut.

Utoqqarnut ulloqartitsinermi pilersaarut naapertorlugu ilaatigut naalagiaqatigiinneq, assinik saqqummersitsineq, nereqatigiinneq, qitik aliikkusersuinerlu kiisalu innuttaasut kikkulluunniit orniguffigisinnaasaannik kaffillerneq sammisassaritinneqassapput.

Allattoq: Káte Hansen, khan@avannaata.gl
Assit: Karen Filskov