Kommunimi innuttaasunik sullissineq suli pitsaanerulersinniarneqarpoq, taamaammallu kommunimi immikkoortortat akornanni ulluni makkunani nutsertunnguaqarpoq. Innuttaasut saaffiginnissutigisartagaat allaffeqarfissuarmi ataatsimut katersorneqassapput, allaffissornikkullu sullissiffiit allaffissuarmiit allanut nuunneqassapput.
- Avannaata Kommunia ukiut marluk matuma siornali pilersinneqarmat innuttaasunut sullissinerput pitsaanerulersinniarsimavarput, maannalu innuttaasunut sullissinermi kiffartuussiffiit allaffeqarfissuarmi ataatsimoortilernerisigut sullissinerput pitsanngoriarteqqinniarparput, Dorthe Løvstrøm Mathiesen pisortaanerugallartoq oqarpoq.
Siunissami inissisimaffissat
Innuttaasut isumaginiakkatik allaffeqarfissuarmi allerpaami susassaqarfinni makkunani saaffiginnissutigisinnaalissavaat: Pisortanit ikiorsiinerit, isumaginninnikkut ingerlatsivik saaffiginnittarfittalik aammalu innarluutilinnik soraarnerussutisialinnillu suliassatigut isumaginninnerit.
Kiffartuussinerit B-964-imi allaffeqarfissuup saninnguaniittumi isumagineqalertussat makkuupput: Meeqqanut inuusuttunullu isumaginninnikkut isumagisassat aamma innuttaasunut sullissineq.
Ilinniartitaanermut ingerlatsivimmiut januaarip 22-ani B-8-mut eqqartuussiviusimasumut nutsissapput.
Sulisoqarnermut, nutserisoqarnermut, MISI kiisalu aningaasarsiaqarnermut naatsorsuutilerinermullu immikkoortortaq Sullissivik-usimasumi Kaaleeraq Poulsenip Aqqutaa 3-mi, B-1970-imi inissinneqassapput. Inuussutissarsiornermut immikkoortortaqarfik Kussangajaannguaq 20, B-462-imi inissisimalissaaq.
Nutsernerit ukioq manna januaarip 17-iani aallartinneqarput, naatsorsuutigineqarporlu immikkoortortaqarfiit kingulliit januaarip 31-ani inissereersimassasut.
Pisortaqatigiit maanna borgmestereqarfiusumi allaffeqalissapput, tamaanilu borgmesteri innuttaasunik sisamanngornikkut ullaap tungaani isumaqatigiissuteqareernikkut ataatsimeeqateqarnissaminut suli periarfissaqassaaq.
Kommunimi nutsernerit naammassisimalereerpata kommuni immikkoortortanik ammaanersiorluni innuttaasunik Sullissivik-taami 2020-mi februaarip pingajuani kaffillerniarpoq.
Allattoq: Káte Hansen, khan@avannaata.gl
Titartakkat: Avannaata Kommunia
