airplanebooksbriefcase business cogs cross election entertainment fish house law lockmedicalpeopleselfservices socialtax

Atuarfinni pisortat tullersortaallu pikkorissarlutillu isumasioqatigiittut

Avannaata Kommuniani atuarfinni pisortat tullersortaallu ulluni makkunani pikkorissarlutillu isumasioqatigiipput. Pikkorissaatigineqartut pingaarnerit ilagaat tiiminik atuartitsissutissanik pisariitsumik pilersaarusiorsinnaaneq vikarinik atuinerup apparsarneqarnissaanik siunertalik.
12. februar 2020

Avannaata Kommuniani atuarfinni pisortat tullersortaallu aqqanillit kommunimi illoqarfinnit tamaneersut ulluni makkunani pikkorissarlutillu isumasioqatigiipput. Pikkorissaatigineqartut pingaarnerit ilagaat atuartitsissutissanik pisariitsumik pilersaarusiorneq.

Missingersuutit sipportarpaat
- Silap taarsisalernerani upernaakkullu qaammariartortarnerani vikarinik atuinerpaasarpugut, taamaasigaangallu atuarfiit vikarinik atuinissaannut missingersuutaat ajoraluartumik sipporneqartarput. Atuartunut tiiminik atuartitsiffiusunik qaffassaanissaq saniatigullu vikarinik atuisarnerup apparsarneqarnissaa pikkorissarnermi matumani siunertat pingaarnersaraat, taamaasilluta missingersuutit sippornaveersaartalerniassagatsigit. Tamatumanilu tiiminik atuartitsissutissanik pisariitsumik pilersaarusiorsinnaaneq pikkorissaatigineqarpoq, Aka Grønvold Avannaata Kommuniani Ilikkariartornermut pisortaagallartoq oqarpoq.

Avannaata Kommuniani atuarfinnit 27-usunit qulingiluat vikarinik atuinissamut missingersuusiat ataallugit atuisimapput sinnerilu missingersuusianik atuivallaarsimapput. Atuarfiit katikkaanni vikarinut missingersuusiat agguaqatigiissillugu 3 %-inik 2019-imi qaangerneqarsimapput, taakkulu aningaasanngorlugit 472.000 koruuniupput. Nalunaaquttap akunnermusiallit missingersuusiani ilaapput, soorlu eqqiaasut, pedellit aamma ilinniartitsisut nalunaaquttap akunnermusiallit, taamaakkaluartorli vikarinik atuivallaartarneq missingersuusianik qaangiisarnernut pissutaanerupput.

Meeqqat atuarfianni vikarinik atuisariaqartarneq nunatsinni qangali ajornartorsiutaavoq, siornatigullu aamma IMAK-imi – Ilinniartitsisut Meeqqat Atuarfianneersut Kattuffianni – eqqartorneqartarpoq. Avannaata Kommunianilu siorna aalajangertoqarpoq ajornartorsiut iliuuseqarfigineqartariaqartoq. Eqqartuinerit pilersaarusiornermik kinguneqarput, maannalu Annette Mikkelsen Danmarkimi IST-mi siunnersorti pikkorissaasoralugu pikkorissartoqarluni.

Atuarfinni pisortat tullersortaasalu ulluinnarni atuarfinnik aqutsinerminni piginnaasatik isumasioqatigiinnermi pikkorissarnermilu pitsanngorsassavaat, ilaatigullu aningaasaqarniarnermi aqutsineq aamma inuit ataasiakkaat pillugit paasissutissanut inatsit pillugu pikkorissaatigineqarlutik. Pikkorissaasuupput Ilikkariartornermut Ingerlatsivimmi sammisanik ingerlatsisoq Rie Johansen aamma Hanne Holm Andersen Teknikkeqarnermut Ingerlatsivimmi pilersaarusiornermi ingerlasisoq. Taamatuttaaq UNICEF Danmarkip nunatsinni suliniutilerinermi ingerlatsisua Sara Olsvig ingerlatsisoralugu meeqqat pisinnaatitaaffii FN-illu nunarsuarmi anguniagai ullormi ataatsimi immikkut suliniutitut sammineqarput.

Allattoq: Káte Hansen, khan@avannaata.gl
Asseq: Avannaata Kommunia


Avannaata Kommuniani atuarfinni pisortat tullersortaallu Hotel Arctic-imi Ilulissaniittumi pikkorissarnerannit, saamerlerniit: Atuarfimmi pisortaq Akitsinnguaq J. Larsen, Atuarfik Mathias Storch, atuarfimmi pisortamut tullersorti Bibi Gitte Lynge, Atuarfik Mathias Storch, atuarfimmi pisortamut tullersorti Tukummeq Qaerngaaq, Avanersuup Atuarfia, atuarfinnut siunnersorti Ane S. Hansen, Ilikkariartornermut Ingerlatsivik, atuarfimmi pisortamut tullersorti Susi Hinrup, Prinsesse Margrethe Skolen, atuarfimmi pisortaq Nuka Sørensen, Prinsesse Margrethe Skolen, atuarfimmi pisortaaneq DanD. Normann, Avanersuup Atuarfia, atuarfimmi pisortaq Josef Karlsen, Kullorsuup Atuarfissua, atuarfimmi pisortaq Lars Fleischer, Atuarfik Edvard Kruse, atuarfimmi pisortamut tullersorti Søren Greve, Kullorsuup Atuarfissua, pisortaagallartoq Aka Grønvold, Ilikkariartornermut Ingerlatsivik, atuarfimmi pisortamut tullersorti Nivikkannguaq Mathiesen, Atuarfik Jørgen Brønlund aamma atuarfimmi pisortaq Nielsine Kruse, Atuarfik Jørgen Brønlund.