Ilulissani atuarfiit kommunimi najugaqarfinni kisiartaallutik marsip qaammataagaa alimasissumit atuartitsinermik aallartitsereersimapput, Upernavimmilu atuarfiit iPadinik atuartunut tunniussinissaat tullinnguussimagaluarpoq.
- Atuarfinnik matusigallartariaqarneq Ilikkariartornermut Ingerlatsivimmiut pakasarneqaatigaat, taamaasilluni nualluut Covid-19 alimasissumit atuartitsinermik aallarsariapiloortitsivoq. Naak Upernavimmi iPadimik atuilernissamut piareeqqasoqaraluartoq illoqarfik misileraanissamut inortuilaarpoq, taamaasillunilu alimasissumit atuartitsineq Ilulissani taamaallaat aallarsariapiloortinneqarpoq, Aka Grønvold, Ilikkariartornermut Ingerlatsivimmi pisortaasoq oqarpoq.
Taamaasilluni Ilikkariartornermut Ingerlatsivimmiut, Ilulissani ilinniartitsisut atuartullu ilikkariartornissamut periutsinik qarasaasiatigoortunik misiligarneqarsimanngitsunik misileraasusanngoriasaartinneqarput, tamatumanilu atuartut iPad iluaqusiullugu atuartinneqalerput. Ilikkariartornissamut periutsit nutaat ilinniartitsisut ilaannut ilungersuatitsisimapput, ilinniartitsisunullu allanut suut tamarmik pissusissamisoortutullusooq aaqqissuussatut issimapput.
- Ilikkariartornermut ingerlatsivik ilikkariartornermut siunnersortimik marsimi atorfinitsitsivoq, misileraanitsinnilu pinngitsoorneqarsinnaanani ikiuulluaqaaq. Tamatuma ilutigisaanik nualluut Covid-19 pissutigalugu Danmarkip matusisariaqalerneratigut ilikkariartornissamut atortussat qarasaasiatigoortut akeqartinneqarunnaarput, taamaasillutalu akeqanngitsumik atuisinnaanissatsinnut periarfissinneqarluta. Tamatuma saniatigut Danmarkimi qarasaasianik atuilluni ilinniartitsinermi atortut periarfissallu pillugit qarasaasiatigut alisissumit pikkorissarfigineqarsinnaasut aamma akeqarunnaarmata ilinniartitsisutsinnit iluaqutigineqaqaat. Taamaammat alisissumit ilinniartitsinermik aallarsariapiloortitsineq piaarinaatsoortumik iluatsitsiffiusutut nalilerparput, misilittagarilikkatsinnillu ineriartortitsisinnaalerpugut, Aka Grønvold oqarpoq.
Allattoq: Káte Hansen, khan@avannaata.gl