airplanebooksbriefcase business cogs cross election entertainment fish house law lockmedicalpeopleselfservices socialtax

Nunatsinni takornariaqarnerpaaffimmit ikiorsissutitut aningaasaliissutit naammagineqanngillat

Kalaallit Nunaanni takornariaqarnerpaaffiusartumi Ilulissani takornarialerisartut isumaqarput Naalakkersuisut ikiorsiissutitut aningaasaliisutigisartagaat naammanngitsut. Taamaammat takornariartitsisartut nalorniuaannannginniassammata ammaasoqaqqinnissaa pillugu pilersaarusiamik ersarissumik Avannaata Kommunianit ujartuisoqarpoq.
23. april 2020
Ilulissani takornariaqarnermik suliaqartut 40-t tungaannut amerlassusillit - tassalu unnuisarfiit neriartarfiillu ilanngullugit – nualluutip coronap tuniluunnera pissutigalugu nunatta matuneqarnera misillerfigilereerpaat. Tikeraarniat nunanit allaneersut ukiup aallartinneraniit poorskimilu tikerarnissaraluatik taamaatiortorpaat, pingaartumillu unnuisarfeqarfiit neriniartarfeqarfiillu millionilikkaanik annaasaqartiterput.

- Takornariaqarnerup aallarniutigisartagaa piviusunngunngitsoorpoq, takornariaqarnermillu suliaqartut siunissartik aarlerigisorujussuuaat. Timmisartuussisarnernik matoqqatitsineq sivitsorneqassappat suli kingunerlunnerusinnaavoq. Taamaammat takornariartitsisartut taperserlugit nunatta avataanut timmisartuussisarnerit ammaanneqarnissaannut pilersaarusiamik Naalakkersuisut ujartuivigaavut, taamaasilutik takornariaqarnermik suliaqartut pilersaarusiorsinnaalerniassammata. Tamanna piaartumik pinngippat sulisunik amerlanerusunik angerlartitsisoqaratarsinnaavoq, ajornerpaamillu akiliisinnaajunnaartiternerit ajorluinnartumik kinguneqartussat pinngitsoortissinnaajunnaarsinnaavagut – takornariartitsisartuniinnaanngitsoq aamma unnuisarfeqarnermiinnaanngitsoq aammali Kalaallit Nunaanni takornariaqarnerpaaffiusartumi Avannaata Kommuniani, borgmesteri Palle Jerimiassen oqarpoq.

Ilulissani takornariaqarnermut siunnersuisoqatigiinni apriilip 16-iani ataatsimiinnermi takornariaqarnermik suliallit oqaatigaat nunatta avataanut timmisartuussisarnerit ammaanneqarpata takornariat nunatsinnukannginnerini nualluummik Covid-19-imik nappaateqarnersut misissuivigineqartalertariaqartut.

Ilulissani hotelini sulisut 25-t maannamut angerlartitaareerput sulinermilu ikiorsiissutinik pisartagaqartinneqarlutik. Uummannami, Upernavimmi aamma Qaanaami takornariartitsisartuni sulisunik angerlartitsisoqanngilaq.