iPad-it Upernavimmi atuarfimmi misiligarneqalersut

- Atuaqatigiiaat ilaanni atuartut iPad-inik tunineqareerlutik soqutiginnippallaannginnerat tupaallaatigaara. Atuartut ilaat taamaattunik peqarratereerput atornissaallu ilisimaaralugit, tamannalu pissutaagunarluni soqutigivallaanngitsutut ippaat. Kisianni soorunami atuartut ilaqarput aatsaat taamaattunik pigisaqalersunik, taakkulu atortutaaminnut soqutiginnittorujussuupput, Nuka Sørensen Upernavimmi Prinsesse Margrethe Skolenimi atuarfimmi pisortaq oqarpoq.

Atuartitsissutinik qarasaasiatigoortunik atuineq aasami atuanngiffeqareernerup kingorna aatsaat aallartilluarneqassaaq. Taamaammallu atuartut ilinniartitsisullu ilinniartitsinermi atortussianik qarasaasiatigoortunik atuineq aasamut atuanngiffeqalernissap tungaanut sungiusarujuussavaat.

- Atuarfimmi ilinniartitsisut tamarmik atuartitsinermi atortut qarasaatigoortut pillugit pikkorissarnikuupput. Tamatuma saniatigut qarasaasialerinermi sulialimmit atortorissaarutit tungaasigut ikiorneqarsinnaapput aammalu atuartitsissutinik qarasaasiatigoortunik atuineranni ilinniartitsinerup tungaatigut ikiortimit ikorfartorneqarsinnaallutik. Ikiortilu taanna aamma atuartitsissutit atorneqarnissaannut tunngasunik Danmarkimi suliffeqarfimmit isumassarsiornissamut periarfissaqarpoq, Nuka Sørensen nassuiaavoq.

Atuartut angajoqqaavi atuartitsissutinik qarasaasiatigoortunik atuilernissamik ilisimatinneqarnikuullutillu iPadimik atuinissamut maleruagassanik saqqummiivigineqarnikuupput.

Upernavimmi atuarfik atuartitsissutinik qarasaasiatigoortunik Avannaata Kommuniani atuilersitsinissami tulliusimavoq maannalu atuartitsissutinik atueriaannanngorluni. Ilulissani atuarfinni marlunni atuartitsissutinik qarasaasiatigoortunik atuineq marsip qaammataani corona pissutigalugu atuarfinnik matusigallartariaqarlernermut atatillugu aallarsariapiloortinneqarpoq.

Uummannami atuarfik atuartitsissutinik qarasaasiatigoortunik peqalereerpoq teknikkitigullu piareersaasiortoqareerpat atuileriaannaassalluni . Qaanaami atuarfik atuartitsissutinik ukiaru pissarsereerpat atuutilersitsissaaq. Tamatuma kingorna atuartitsissutit assingi nunaqarfinnut nassiussuunneqarlutillu atuutilersinneqarumaarput.

Allattoq: Káte Hansen, khan@avannaata.gl
Assit: Prinsesse Margrethe Skolen