airplanebooksbriefcase business cogs cross election entertainment fish house law lockmedicalpeopleselfservices socialtax

Qassusersorluni qaleralinniarneq inatsisaatsulioqataaffigerusunngilarput

Avannaata Kommuniani aalisartunik ajornartorsiortoqarneraalluni qassusersorluni qaleralinniarnerup sivitsorneqarnissaanik Inatsisartut Aalisarnermut, Piniarnermut Nunalerinermullu Ataatsimiititaliaanit kaammattuuteqarneq inatsisaasulioqataaffigerusunngilarput.
7. maj 2020
Inatsisartut ataatsimiititaliaanit Avannaata Kommuniani aalisartunik ajornartorsiortoqarneraaneq
ilisarisinnaanngilarput. Akerlianik kommunitsinni aalisartunik suleqateqarluarnitsigut qassusersorluni qaleralinniarneq maleruagassanik malinnilluta ingerlapparput. Assersuutitullu marlussunnik taasaqassaagut:

Siorna qassusersorluni qaleralinniarnermi maleruagassat malinneqanngimmata qaleralinniarneq matuarput. Ukioq mannalu aalisartut akornanni unioqqutitsitsilluni qassusersorluni qaleralinniartoqarmat matusinissamik kommunimit sioorasaatuteqarluta Ilulissani Aalisartut Piniartullu Peqatigiiffiannik suleqatiserinnippugut. Aalisartut, peqatigiiffik kattuffillu suleqatigiipallannermikkut unioqqutitsinernik unitsitseqqusilluta innersuussinerput suleqataaffigaat iluatsittumik. Taamaasilluni unioqqutitsilluni qassusersornerup unitsinneqarneragut aalisartut aningaasarsiornerannut kingunerluuteqartussaagaluaq pinngitsoortinneqarpoq.

Maannamut aalisartut qanimut suleqatigaavut, taamaammallu aamma aalisartut akornanni ajornartorsiortoqarneranik tusagaqarsimanngilagut.

Inatsisartut ataatsimiititaliaanit qassusersorluni qaleralinniarnerup sivitsorneqarnissaanik kaammattuuteqarneq isumaqataaffigisinnaanngilarput. Inatsisartut ataatsimiititaliaat sinnerlugu siulittaasoq Henrik Fleischer sivitsuinissamik kaammattuuteqarluni allappoq, pineqartumi kommunip suliassai pineqartut ataatsimiititaliamit ilisimaneqartut aammalu ataatsimiititaliaq Naalakkersuisulluunniit Avannaata Kommunianut suliamut tassunga tunngatillugu iliuuseqaqqusisinnaanngitsut. Tamanna ilumooqqiffissaqanngilaq. Inatsisartut ataatsimiititaliaat kommunip susassaqarfiinut tunngasunik akuliuttussaatitaanngillat. Taamaattumik-una maanna inatsisartut ataatsimiititaliaata maleruagassanik allannguiniarnera inatsisinik unioqqutitsiniarnertut nalilerusukkipput aammalu tamat oqartussaaqataanerannik innarliinertut nalilerusukkipput.

Inatsisartut Ataatsimiititaliaanit kommunitta susassaqarfiinut akuliunniarnermi kommunimi aqutsisunut soqutaanngitsutut iliuuseqarfiginninniarneq akuersaaruminaatsipparput. Nalunngilarpummi aqutsiniarnitsinni maleruagassanik unioqqutitsigutta akiliisitaanermik kinguneqartussaasoq.

Inatsisinik malerugassanillu malinnilluta qassusersorluni qaleralinniarneq ingerlallugu aalisartut kommunitsinni sumiiffinni tamaniittut qanimut suleqatigalugit maannamut inissisimavugut, taamaattumillu qassusersorluni qaleralinniarnerup sivitsorneqarnissaanik kaammattuuteqarneq inatsisinik aamma saneqqutaarinninnerussammat tapersersorusunngilarput.


                                  Jakob Petersen                                                            Palle Jerimiassen
Aalisarnermut Piniarnermullu ataatsimiititaliami siulittaasoq          Avannaata Kommuniani borgmesteri