Kissartoqarfioqisulli maanna annikillerujussuareerput, ataasiakkaalli suli kissartorujussuullutik. Taakku sumiiffiit kissartorujussuit tassaapput tikikkuminaannerpaat. Taakku tassaapput ukiut ingerlanerini eqqakkat sioqqanik qallersorneqartarsimasut, taamaasilluni qaleriiaat taama ittut arlaqarlutik. Taamaattumik kissartoq tamakku pissutigalugit tikikkuminaaqaaq.
Ersittuni tamani ikuallassinnaasut ikumareerput, taamaasilluni kissartoqarfiit eqqaavissuup naqqani meterinik arlaqartuni itissusilinniillutik.
Qamisaaniarnermi ajornartorsiortitsinerpaaq tassaavoq anorip sammiviata allanngorarnerujussua. Tamatuma kinguneranik qatserisartut illuartittarnerat akulikippoq nutaamik sammivilerlutik qamisaaqqinnissaannut. Tamatuma aamma kinguneranik silaannaq kissartoqarfinnut pingaangat kissarnerni ikumasoqaqqilersarpoq inneq annertuseqqilluni.
Anori avannamik kippasimmik sammivileqaleraangat aamma kingunerisarpaa, illoqarfiup tungaanut pujorsuaq siaruaattarmat innuttaasunut iluaalliutaasaqisumik, tassa ikuallassunnersuarmik.
Tamakku patsisingalugit oqaatigiuminaappoq qanoq sivisutigisumik suli qamisaanerup ingerlannissaa. Kisiannili oqaatigineqareersutut kissarneq annertooq maanna annikillisikkiartuaalerpoq taamaasilluni piffiit ilaanni nillusaanerit kiserngorutilerlutik.
Ullumikkut Air Greenlandip qulimiguua ikiuuttilerparput immamiit kissartoqarfiit taakku kuerartillugit.
Qatserisartut qasoqqaqisut saniatigut, illoqarfimmi nammineq kajumissutsiminnik ikiuukkiat ikiuulluarsimaqaat, uagut qatserisartortatsinnut sumiiffimmi oqilisaassilluarsimaqisunik. Tamatuma saniatigut sulliffeqarfiit namminersortut allallu, kiisalu Nukissiorfiit, Mittarfeqarfiit aamma Air Greenland il.il. qamisaaniarnermi suliami annertuumik ikiorsiisarsiapput. Taakkununnga qujassuteqaqaagut, pisumi ajornartorsiorfioqisumi paasinnilluarmata.
Aamma Ilulissani innuttaasunut qujanarujussuaq, pisup ilaani annertuumik paasinnittoqartarmat. Aamma paasisinnaalluarpakka pujormiullutik iluaalliutaannut, aammali nassuerutigisariaqarlugu, iliuusissagut tamaasa atorlugit, qamisaaniarneq ajornakusooqisoq, sapinngisamik piaarnerpaamik, naammassiniarsarigatsigu.
Inussiarnersumik inuulluaqqusillunga
Jens Dahl
Upalungaarsimatitat pisortaat, Avannaata Kommunia