Eqqakkanut, saviminikunut assigisaannullu Ilulissani tunniussinermi akit ullumikkut kubikmeterimut naatsorsorneqartartut 2020-mi juulip 1-ani allanngortinneqassapput. Eqqakkat saviminikullu ullormit tassanngaanniit tonsinngorlugit uuttortarneqartalissapput, taamaasillunilu eqqakkanut oqimaalutaavik nutaaq atuutilersinneqassaaq.
Naak eqqakkanut uuttortaavik siorna pisiarineqarsimagaluartoq akinut aalajangersakkat akuerineqarsimasut aammalu kommunalbestyrelsimi eqqartorneqareernerisa kingorna aatsaat allanngortinneqarsinnaasut pissutigalugit atorneqarsinnaasimanngilaq.
Akinik allannguinissaq kommunalbestyrelsimi ullumi ataasinngornermi juunip 29-ani eqqartorneqarpoq, akillu allanngortinneqarnissaannik aningaasaqarnermut ataatsimiititaliap inaasuteqaataa akuerineqarpoq.
Eqqakkanut oqimaalutaaviup nutaap atuutilersinneqarnera ilutigalugu suliffeqarfiit allallu eqqakkanik tunniussinerminni eqqagaatiminnik immikkoortitereersimasussaapput. Taamaasilluni kommunimi sulisut eqqakkanik immikkoortiternerlutanik suliaqartarunnaassapput, tamannalu ikuallaavimmi sulisut sulinermi atugaasa pitsaanerulernerannik kinguneqassaaq.
Allattoq: Káte Hansen, khan@avannaata.gl