Ivigaasanik arsaattarfiliartaaq pingasunngornermi juulip 1-ani atoqqaarfissiortinneqartussaagaluarpoq. Ivigaasat nipititerneqarnerisa atasinnaannginnerat kinguartitsinermut peqqutaavoq, taamaammallu ivigaasat aallaqqaataaniit nipititerneqartariaqarsimapput.
- Arsaattarfittaassami ivigaasalersuilluni sulineq piffissami kingullermi ilungersuaffiusimavoq ulloq unnuarlu suliffiusarluni, ilaatigullu allaat kommunip sulisui aammalu Danmarkimi Nordisk Kunstgræs-imeersut ullaassamut pingasut-sisamat tungaannut sulisariaqartarsimallutik, Attoumane Said Issilam, Teknikkeqarnermut Ingerlatsivimmi suliniutilerinermi aqutsisoq oqarpoq.
Taamaammallu arsaattarfittaassap atoqqaarfissiortinnissaa tallimanngornermi julip pingajuani nalunaaqutaq 15.00 pisussanngorpoq.
Atoqqaarfissiortitsinissaq aallarnerlugu Peqqinneq Sunngiffillu illoqarfimmi susassaqartitsinermi aaqqissuussisartut tikilluaqqusissapput. Tamatuma kingorna borgmesteri Palle Jerimiassen oqalugiaateqassaaq, kingornalu timersoqatigiiffiit I-69-ip aamma Nagdlúnguaĸ’-p siulittaasui oqalugiaateqassapput. Atoqqaarfissiortitsinngilaattaa illoqarfimmi innuttaasut silami kaffillerfigineqarlutillu pølsenik siaasakkanik sassaalliiffigineqassapput.
Timersoqatigiiffiit I-69-ip aamma Nagdlúnguaĸ’-uup arnartai arsaattarfik atoqqaarfissiorlugu nal. 16.30 arsaallutik unammilissapput.
Atoqqaarfissiortitsinermi pilersaarut kommunip Facebookiani takuneqarsinnaavoq.
Allattoq: Káte Hansen, khan@avannaata.gl