Avannaata Kommuniani Peqqinneq Sunngiffillu timersoqatigiiffiit qanimut suleqatigalugit arsaattarfittaamik paarsilluarnissaannik kajumissaaruteqarput.
- Naak arsaattarfittaaq ivigaasanik ninngusuunik qallersorsimagaluartoq atuisut arsaattarfimmik paarsilluarnissaannik kajumissaarpagut, tassami aserfallassimasut aaqqissortinnissaat akisusussaammat. Taamaammat arsaattarfimmi pujortarneq, sikkilerneq aammalu scooterinik allanilluunniit motorinik ingerlatilinnik atuineq inerteqqutaavoq. Taamatuttaaq aamma qimmiutillit arsaattarfiup eqqaani najugallit qimmiutimik arsaattarfimmut iserlutik ivigaasaaqqanik innarliinnginnissaat nakkutigeqquarput, Rigmor Villadsen, Avannaata Kommuniani Peqqinneq Sunngiffillu-mi immikkoortortami aqutsisoq oqarpoq.
Arsaattarfittaap sananeqarnera suli naammassineqaqqajanngilaq. Arsaattarfimmi ungaluneqartussaavoq aammalu saneraani isiginnaariat issiavissaannik sanasoqartussaalluni.
- Ungalulersuinissami atortussat umiarsuarmik piaartumik tikisinneqarnissaat sulissutigineqarpoq, taamaasilluni ungalulersorneqarnera suliarineqalertorniassammat. Tamatuma saniatigut avannaani kaperlattarmat ivigaasaaqqanik arsaattarfiup qullilersorneqarnissaa aamma sulissutigineqarpoq, Rigmor Villadsen oqarpoq.
Peqqinneq Sunngiffik-mit timersoqatigiiffinniillu iluatsillugu aamma kaammattuutigineqarpoq, arsaattarfimmik atuisartut arsaatinik naleqquttunik atuisaqqullugit.
Allattoq assiliisorlu: Káte Hansen, khan@avannaata.gl