airplanebooksbriefcase business cogs cross election entertainment fish house law lockmedicalpeopleselfservices socialtax

Avanersuarmi piniakkat piniariaatsillu illersorneqarnissaat isumasioqatigiissutigineqalersut

Qaanaami aalisartut piniartullu peqatigiiffiat Avannaata Kommunianik suleqateqarluni piniakkanik pisassiissutit piniariaatsillu pillugit isumasioqatigiissitsiniarput, eqqartugaallu Kalaallit Nunaannut tamarmut siaruaatsinneqarnissaat kissaataavoq.
3. august 2020

Isumasioqatigiinnissaq Avannaata Kommunianit aammalu Qaanaami aalisartut piniartullu peqatigiiffianit aaqqissuunneqartussaq ukiamut sapaatit akunnerini 39/40-mi pisussanngortinneqarpoq. Aaqqissuisut, uumasunik piniakkanik illersuineq kiisalu piniariaatsit il.il. pillugit oqallinneq Kalaallit Nunaata sinneranut siammarneqarnissaa siunertarineqassasoq eqqarsaatigaat.

- Qilalukkanik qaqortanik qernertanillu illersuineq piniarnerlu pillugit nalunaarutip nutarterneqarnissaa aammalu piniariaasitoqqatta illersorneqarnissaannik eqqartuinissaq isumasioqatigiinnissami siunertaavoq. Qilalukkanik qaqortanik qernertanillu ukiumut pisassiissutaasartut piujuartitsiniaannarluni taamaaginnartinneqarnerisigut qilalukkani nappaalasoqalernissaa toqorartoqalernissaalu aarleqqutigaarput. Tamanna orniginartinngilarput, taamaammallu pisassiissutit qaffanneqarnissaat kissaatigaarput, Mads Ole Kristiansen, Qaanaami aalisartut piniartullu peqatigiiffianni siulittaasoq oqarpoq nangillunilu:

- Akitsinni naggueqatitsinni illoqarfik Qaanaamiit inukinnerusoq 100-t sinnerlugit ukiumut pisassinneqartarpoq, uffa massa Qaanaami 640-nik inulimmi ukiumut pisassiissutigineqartartut 100-uunngitsulluunniit.

Pisassiissutit nammineq isumagisalerusuppaat

Qilalukkat qernertat pillugit siunnersuinermi 2022-p tungaanut ukiumut 103-t Avanersuarmi pisarineqarnissaat siunnersuutaavoq, qilalukkallu qaqortat pillugit siunnersuinermi 2022-p tungaanut ukiumut 20-t siunnersuutigineqarlutik.

Namminersorlutik Oqartussat nittartagaanni paasissutissiinerit naapertorlugit qilalukkat qernertat 176-t Avanersuarmi 2019-imi pisarineqarput, taakkunannga 46-t ukiup siuliani pisassarititanit sinneruttuneersuullutik, aammalu ukiumi tassani qilalukkat qaqortat 105-t Avanersuarmi pisarineqarsimallutik.

Aalisartut piniartullu peqatigiiffianni siulittaasoq nassuiaavoq, ukiut 4.000-it missaanni nunatsinni piniartutut inuusoqarsimanerani piniakkanik nungusaasoqarsimaneranik uppernarsaatissaqanngitsoq.

- Akerlianilli europamiut arfanniat nunatsinni arfanniarnerisigut qullernut ikummatissamik pissarsiniarneranni arferit nungujartupallatsikkaluarpaat.

- Nukappiaraanitsinniilli qilalugarniaqataasarnitsinni qilalukkat ikiliartorsimanerinik takusaqarsimanngilagut akerlianik amerliartupiloornerat takujuarparput. Taamaammat NAMMCO aammalu nunarsuaq tamakkerlugu arfanniarnermi ataatsimiititaliarsuaq IWC qanoq iluaqutigisimanerlutigit apeqqusertariaqarparput, taakkuummata qilalukkanik qaqortanik qernertanillu pisassiissutit amerlassusilernissaannut pisooqataasut. Takkunannga  ukiorpassuarni tatisimaneqarsimavugut, maannalu Islandi assigalugu pisassiissutinik nammineq isumaginnilernissarput piffissanngorpoq, Mads Ole Kristiansen oqarpoq.

Piniartut allaneersut

Avanersuarmi piniartut Kalaallit Nunaanni kisiartaallutik qaannamit naaligarlu atorlugu qilalukkanik qaqortanik qernertanillu suli piniartarput.

- Piniariasitoqqagut 1929-imi allaat naqitatigut aalajangersaavigineqarsimasut illersorniakkatta ilagisaat aamma isumasioqatigiinnermi eqqartorusuppagut. Ilaatigut ningertaliisarnerit kinguaariippassuarni kingornunneqartarsimasut aammalu atorunnaarsinneqariartornissaannut navianartorsiortinneqartut aamma eqqartorusuppagut. Ningertaliisarnerit pillugit ajoraluartumik piniartut ataasiakkaat akornanni isumaqatigiinngillattaasoqartalerpoq, tassa qanoq ningeqartitsinissaq nalusaramikku. Piniartuuniaraanni tamakku ilisimaneqartariaqarput, tassami imminut ikioqatigiinnissaq ilaatigut siunertaammat, Mads Ole Kristiansen oqarpoq.

Piniartulli qangaaniilli piniariaasitoqaat ilaatigut nalunaarummit illersugaasoq avataaneersunit ataqqineqanngilaq.

- Siorna qilalugartassaaruteriataarnitsigut uisitaavugut. Paasilerparpullu piniartut Upernaviup eqqaaneersut Qaanaamut nuussimariarlutik qilalugartassaminnik akuerineqarsimasut. Kingorna qilalugartassat nungummata utimut nooqqissimapput. Assinganik pisoqaqqinnginniassammat Avanersuarmi pisassarititat avataaneersunit piniarneqarsinnaajunnaarsillugit qulakkeerniarpagut, Mads Ole Kristiansen oqarpoq.

Piniartut Qaanaap nunaqarfiinit Savissivimmeersut Siorapalummeersullu isumasioqatigiinnermi peqataatikkusunneqarput.

 

Allattoq: Káte Hansen


Foto: Aningaaq R Carlsen