Kommunalbestyrelsimi sisamanngornermi aggustip 20-ani immikkut ittumik ataatsimiittoqarmat borgmesteri Palle Jerimiassen ilisimatitsivoq, kommunimi pilersaarutit aningaasaqarniarnerullu tungaatigut killiffiit pillugit atorfilittanik peqateqarluni kommunimi illoqarfinnut pilersaarutaasumik ataatsimiisitsiartorniarluni. Kommunalbestyrelsemili ilaasortat ataasiakkaat coronap tuniluuteratarsinnaaneranik aarleqquteqarlutik oqaaseqarput, tamannalu tunngavigalugu ataatsimiinnissat qanoq ingerlanneqarsinnaanissaat oqaluuserissallugu borgmesterip partiit oqaaseqartartui ataatsimiigiaqquai.
- Ataatsimiinnissaraluit pilersaarutaareeraluarput, ullullu 14-it ingerlaneranni ingerlanneqartussaagaluarlutik. Allaat angalanissami partiit tamarmik sinniisuutitaqarsinnaanerat neqeroorutigaara, taamaakkaluartorli isumaqatigiissutigaarput corona atuutsillugu kommunalbestyrelse akisussaaqataalluni maligassuisariaqartoq. Taamaammallu ataatsimiinnissaraluit pilersaarutaareersut taamaatiinnarpagut ataatsimiinnerillu attaveqaatit atorlugit ingerlanneqarnissaat pilersaarusiulerlutigit, Avannaata Kommuniani borgmesteri Palle Jerimiassen oqarpoq.
Illoqarfinni najukkani ataatsimiititaliat aamma nunaqarfinni aqutsisut ataatsimiinnerni peqataassapput.
Allattoq: Káte Hansen, khan@avannaata.gl