Eqqartuinissamut qununatalu meeqqat immikkut pisariaqartitsisut sullippagut

Inuit Innarluutillit Illersuisusata Christina Johnsenip nittartakkatigut nutaarsiassaqartitsivimmi Sermitsiaq.AG-mi septembarip 22-ani oqariartuutai ingasaginarlutillu inussiarniippalaarput, ilaatigullu oqaatigaa, Qaanaami meeqqat immikkut ittunik pisariaqartitsisut puiuinnarneqartut, Avannaata Kommuniani ajornartorsiutinik eqqartuinissamut qunusoqartoq aammalu meeqqat meeqqat inuusuttullu pillugit siunnersuisarfimmi MISI-mi misissuiffigineqartussanngorlugit innersuussinissamut nangaasoqartoq.

Inuit Innarluutillit Illersuisuat Christina Johnsen allaaserisami oqartinneqarpoq, nammineq Tilioq-meersullu Qaanaamiinnerminni meeqqat suli atualersimanngisut atualereersimasullu arlallit suli oqaaseqalersimanngitsut naapissimallugit, taakkulu pineqartut ilaqutaasunit arlalinnit paasinnissinnaanngitsut. Oqariartuutigineqartoq ilisarineraannarsinnaavarput.

Qaanaaginnarmi meeqqat immikkut ittunik pisariaqartitsisut qulingajannik amerlassusillit malittareqqiiffigalugillu suleriarnissamut pilersaarusiuullugillu meeqqat inuusuttullu pillugit siunnersuisarfimmut MISI Avannaa-mut innersuullugit suliniuteqarfigineqarput. Suliaq tamanna kingullermik ukioq manna septembarip 30-aniit oktobarip 9-ata tungaanut nangeqqipparput. Suliami siunertaavoq immikkut atuartitsinermi siunnersortimik siunnersuineq, meeqqanik misissuiffigineqartussatut innersuussanik misissuineq aammalu ilisarsisinnaassutsikkut ineriartornermi ajornartorsiuteqarneq, autisme kiisalu pineqartuni nutaarsiassat kingulliit pillugit pikkorissaaneq.

Qaanaamut taamatut suliaqariartortarnerit kommunip sinneranisuulli ataavartumik ingerlanneqartarput, tamatumanilu MISI Avannaa, ilinniartitsisut, isumaginnittoqarfimmeersut, meeqqat angajoqqaallu ataasiakkaat suleqatigillutik meeqqat inuusuttullu illersorniarlugillu ikorfartorneqartarput, taamaasilluni meeqqat pisinnaatitaaffii qulakkeerniarneqartarput pingaartumillu meeqqat isumaginninnerup tungaatigut pisariaqartitsisut imaluunniit immikkut pisariaqartitsisut ineriartornikkut, atukkatigut aammalu peqqissutsikkut peqatitik assigalugit ineriartorsinnaallutillu namminersortutut inersimasunngorsinnaaniassammata. Sulineq tamanna meeqqanik inuusuttunillu ikiorsiisarneq pillugu Inatsisartut peqqussutaat malillugu ingerlanneqartarpoq, tamatumanilu ersarissumik nassuiarneqarpoq, meeqqat ilaqutariillumi ataasiakkaat illersorniarlugit ikiorsiinerit suut ikiorsiissutigineqassanersut. Tamatuma saniatigut atuarfinni atuartitsissutitigut pilersaarusiat siunertamissut ingerlanneqarnersut qulakkeerniarlugit atuarfiit kommunip tungaanit nakkutigineqartuarput.

Suliniarnitta ersersippaa ajornartorsiutinik eqqartuinissamut qununngilluaasartugut aammalu meeqqat immikkut pisariaqartitsisut ataasiakkaat qanoq ikiorneqarlutillu ikorfartorneqarnissaat pillugit eqqartuisartugut. Taamaammat Inuit Innarluutillit Illersuisuata ”Imminnut isumagisassanngorlugit sumiginnarneqarput. Ikiorniarlugit iliuuseqartoqanngilaq”-mik oqariartuuteqarnera pissusiviusunik equtitsingaatsiarneruvoq, tamannalu pissuserissaannginnermik taarusullugulu angusaqarluarniarluni suleqatigiinnissamut tulluartuusorinngilarput.

Kingusinnerusukkut nalunaarutitta ilagaat Kalaallit Nunaanni illoqarfinni siullersaalluta Ilulissani ilinniartitsisut perorsaasullu atorfiinik tamakkiisunik inuttaliisimanerput. Assersuummi tamatumani erserpoq, kommunitsinni meeqqat inuusuttullu ilumut suliniarfigineqartut.

Siusinnerusukkut oqaatigeriikkattuulli akimmiffiit ajornartorsiutillu innarluutillit illersuisuata nalunaarusiaani ersarissarneqartut akuersaarpakka. Piunerat assortornianngilakka, taamaakkaluartorli innarluutillit illersuisuata Tilioq-mit Qaanaami paasissutissanik katersugarisimasai Avannaata Kommuniani suliaasunut naapertuunnersut ilanngullugit misissorsimasuuppagit nalunaarusiamut iluaqutaaqqajaqaat. Taamatuttaaq Sermitsiaq.AG innarluutillit illersuisuata oqaaserisimasaanik kommunimut apuussisimannginnera assuarerusuppara. Meeqqat inuusuttullu immikkut ittunik pisariaqartitsisunik eqqartugaq mianernarpallaarpoq mianersuullugulu sammineqartariaqarluni.

Palle Jerimiassen
Borgmesteri
Avannaata Kommunia