airplanebooksbriefcase business cogs cross election entertainment fish house law lockmedicalpeopleselfservices socialtax

Ilinniagaqalernissani pingaarnerutillugu kommunalbestyrelsimit tunuartoq


Susanne K. Eliassen Siumut sinnerlugu kommunalbestyrelsimi ilaasortaasoq ilinniagaqalernissani pissutigalugu kommunalbestyrelsimit tunuarniuteqarpoq.
29. december 2020
Susanne K. Eliassen Upernaviup eqqaanit Innaarsunneersoq ilinniagaqalernissani siunertaralugu Majoriaq-mi piginnaanngorsarnini pingaarnerutinniarlugu kommunalbestyrelsimi ilaasortaajunnaarniarluni qinnuteqarpoq.

Susanne K. Eliassen ataatsimiititaliani marlunni ilaasortaasoq aammalu ataatsimiititaliami allami sinniisuusoq kommunalbestyrelsimi decembarip 21-ani immikkut ittumik ataatsimiinnermi nassuiaavoq, ilinnigaqalernissaminut piginnaanngorsarnermini pingaartumik novembarip decembarillu qaammataani ataatsimiinnerpassuarni peqataasarnermini atuanngitsoortarnini atuarnerminut sunniuteqarsimasut. Tamannalu tunngavigalugu kommunalbestyrelsimit tunuarniuteqarniarluni aalajangersimavoq.

Thimothæus Petersen aamma Siumumeersoq kommunimut qinersinermi kingullermi Upernaviup pigisaani qinigaanerpaajusup tulliatut taaguunneqarsimasoq Susanne K. Eliassen taarserlugu kommunalbestyrelsimi aamma ataatsimiititaliani ilaasortaalissaaq.

Susanne K. Eliassen 2021-mi januaarip aallaqqaataani kommunalbestyrelsimi ilaasortaajunnaassaaq.

Thimothæus Petersen Kullorsuarmeersuuvoq.

Allattoq: Káte Hansen, khan@avannaata.gl