- Kommunalbestyrelsimut qinigassanngortittut 60-it qinigaasinnaatitaasut Qinersinermut Siulersuisut ippassaq akuerivagut tamatumalu kingorna Namminersorlutik Oqartussat Qinersinermut Ataatsimiititaliaannut nalunaarutigalugit, Palle Jerimiassen Avannaata Kommuniani borgmesteri aammalu kommunalbestyrelsimut qinigassanngorteqqittoq oqarpoq.
Partiit arfinillit katillugit 60-inik kommunalbestyrelsimut qinigassanngortitsipput. Atassut arfinilinnik qinigassanngortitsivoq, Demokraatit tallimat, Inuit Ataqatigiit aqqanillit, Naleraq qulit, Nunatta Qitornai ataaseq kiisalu Siumut 27-nik qinigasssanngortitsilluni.
Kommunalbestyrelsimut qinigassanngortitat aqqi uani alakkarneqarsinnaapput.
Pingasut qinigassanngorteqqinngillat
Kommunalbestyrelsimi maannakkut ilaasortaasut pingasut qinigassanngorteqqinnianngitsut tassaapput Ane Lone Bagger, Jørgen Kristensen aamma Jens Danielsen tamarmik Siumut tunuliaqutaralugu kommunalbestyrelsimi ilaasortaasut.
- Kommunimut qinersinissaq ukiorli piareersaasiorneqalerpoq, suullu tamangajammik piareeqqapput. Qinersinermi taasivissat Ilulissat avataatigut najugaqarfinnut 24-nut apuunnissaat amigaatigiinnalerpagut. Qinersinermi taasivissat ukiut siuliinisut qamuteralinnik, qimussinik helikopterimillu assartorneqassapput, iluatsinnissaallu neriuutigiinnassavarput, Palle Jerimiassen oqarpoq.
Avannaata Kommuniani Qinersinermut Siulersuisuni ilaasortaapput Palle Jerimiassen, Siumut, Regine Bidstrup, Inuit Ataqatigiit, Ole Danielsen, Naleraq, Karl Markussen, Atassut kiisalu Jakob Petersen, Siumut.
Demokraatit aamma Inuit Ataqatigiit Qinersinermut Siulersuisuni ataatsimut sinniisoqarniarlutik isumaqatigiissuteqarput, taamalu Demokraatit Regine Bidstrup Inuit Ataqatigiinneersoq aamma sinniisuutitaraat.
Allattoq: Káte Hansen, khan@avannaata.gl