Kommunalbestyrelsimi immikkut ittumik 2021-mi januaarip 26-ani ataatsimiittoqarnerani saqqummiussami allassimavoq, kræftimik nappaateqartunut ilaqutaasut sullinneqarusullutik saaffiginnikkaangata kommunimit sullinneqartarnerat sivitsuuttoorsinnaasartoq aammalu sullinneqarneq suli ingerlatillugu kræftimik nappaateqartup toqusarnera qaqutigoortuunngitsoq.
- Kræftimik nappaateqartoq ilaqutaasulluunniit ingerlatseriaatsinut sorsussallutik nukissaqanngillat. Nappaateqartup nappaateqarnerminik nalunaarfigineqarneraniit kommunimit sullinneqarnera aallartinneqartariaqarpoq. Taamaammat suleriusissiamik Avannaata Kommuniani tamarmi atuuttussamik pilersitsisoqassasoq siunnersuutigaara, suliap saqqummiunneqarnerani ilaatigut taama allassimasoqarpoq.
Kræftimik nappaateqartunut ilaqutaasunullu sullissinissami suleriusissiamik aalajangersaasoqarnissaanik siunnersuuteqartuuvoq Palle Jerimiassen Avannaata Kommuniani borgmesteriusoq. Kræftimik nappaatillip ilaqutaasulluunniit sullinneqartarnerat kommunimut siullerpaamik saaffiginninnermiit aallartinneqartarnissaa borgmesterip kissaatigaa. Suleriusissiami ilaatigut allassimassaaq suleriutsit suut atorlugit ikiorsiisoqassanersoq aammalu ikiorsiiniarnermi iliuusissat periarfissallu ilanngunneqassasut.
Suliaq maanna Ilaqutareeqarnermut Ataatsimiititaliamut suliassanngortinneqartoq kingusinnerpaamik februaarip qaammataani ataatsimiissutigineqarnissaa naatsorsuutigineqarpoq.
Allattoq: Káte Hansen, khan@avannaata.gl