Immikkuullarissutilik toqukkut qimaguppoq

Anthon Geisler 1919-imi nunaqarfimmi Aamaruutissani Qeqertarsuarmiittumi inuuvoq. Sammisassaaleqinnguarani inuuneq sivittajaaq aqqusaarpaa. Aqerlusiorfiullunilu zinkisiorfimmi Maarmorilimmi pisiniarfeeqqami sulilluni 18-inik ukioqarluni aallarpoq. Tamatuma kingorna umiarsuaaqqami Tulla-mi igasunngorluni umiartortunngorpoq. Kingorna orsugiassiorfimmi Ivittuuni saqisutut sulilerpoq, kingornalu iffiortunngorniatut ilinniariarniarluni Danmarkimut aallarpoq. 1950-ikkut aallartilaarneranni nunatsinnut uterluni Ilulissani najugaqalerpoq, tamaanilu ukiut 20-t missaanni iffiortuulluni.

1970-ikkut aallartilaarneranni illoqarfiup kaffebaria siulleq tunuatungaani pisiniarfeerartalik pilersippaa, taamalu illoqarfimmi kalaallit siulliit ilagalugit namminersortutut inuussutissarsiuteqalerpoq. Kaffebareqalerneratigut Aantuut nunat kitaamiut inooriaasiannik illoqarfimmut eqqusseqataavoq. Kaffebari illoqarfimmi taamani innuttaasunit 1500-uunngitsunilluunniit alutorineqaqaaq. Aantuup pølsiutai aappalaartut nammineq kartoffelsalatiliaanik akullit meeraallunga pisiannaaraakka, kartoffelsalatiliaalu nunarsuarmi mamarnerpaatut ulloq manna tikillugu nalilerusuppakka. Kaffebarimi ualikkut issiaarluni Aantuullu pølsiutai kartoffelsalatillit mamarsaatigerujoorlugit jukeboximit nipilersuutinik aliannaarnartunik tusarnaarluni nallerneqarsinnaanngilaq.

Aantuup kioskiutini pilersereerlugu ukiorpassuarni kingullerni takornarianit ussagarfigineqarluartalerpoq. Takornariarpassuit Aantuup Illumiuni pisiniarfeeranngua takornariartarpaat, ilami angut utoqqanngoreersoq pisiniarfiutiminik ingerlatsilluni suliuarsinnartoq takornagassaavoq nalinginnaasuunngitsoq. Qularnanngilarlu amerlasuut Aantuut assiliseqatigalugu ”selfie”-liortarsimassapput. Uangalu nammineq Naalakkersuisunik Danmarkimiillu ministerinik tikeraarteqaraangama ataatsimiinnerit naasullu Aantuummik pisiniarfeeraataanillu takunnikkusulluinnarlutik kimigiisertarput.

Aantuup 101-inik ukioqalereerluni kiisami utoqqalinersiaqalersinnaasutut misigilernissani tikillugu pisiniarfeeraatini aallutaraa. Oqaatigisannaaraa pisiniarfiutini pillugu suli sulerusussuseqartuartuulluni. Ilalumi niuertarfeeraataa peqarluartarpoq. Ukiuunerani sikuunera sivitsuuttoorsimatillugu niuertarfiillu nioqqutissanik aalajangersimasunik peqarunnaariaraangata oqamisarpugut: ”Immaqamiaasiit Aantuup pigissavaa.” Taamaakkajuttarporlumi. Aantuup niuertarfeeraataa peqarluartarpoq.

Aantuup niuertarfeeraatini ingerlarsortuaatigigaa kialuunniit assortorsinnaagunanngilaa. Aallaallumi angutit inuusuttut niuertarfeeraataanit tillinniariartormata inuussutissarsiutigisani illersorniartariaqarsimavaa. Nakkaannajasuunnginnini eqqortuliorniarsarisumillu pissuseqarnermigut taama kusananngilluinnartigisumik ajortuliorniarsarisut akuersaarsinnaannginnamigit marloriarluni tillinniat qimaasissimavai. Tillinniaraluarnerillu iluatsinngitsoortut nutaarsiassatigut tusarliunneqarmata angutit marluk inuusuttut Aantuummut ajorsartariaqarsimanertik misigeqqinngitsoorsimagunanngilaat.

Aantuup inuunermini suliarisimasani aqqutigalugit nunarsuatsinni ukioqqoortoorsuanngorlutik nalinginnaanngitsumik angusaqarsimasut Gerontology Wiki-mi ungasinngitsukkut akuuffigilerpai. Aantuullu tupinnaannartumik toqussi tikillugu eqqarsarsinnaassutsimigut silassorilluinnartuuvoq.

Utoqqaat illuanni pulaarnerma kingullliit ilaanni ornillugu oqamivunga 102-nik ukioqalinngujoornerarlugu. Quiasaarluni akereerpaanga, tassagooq siorna 101-nik ukioqalerami aallaqqaataaniit aallarteqqiinnarami siornalu ataatsimik ukioqalersimalluni ungasinngitsukkullu aappiiniarluni aammalu pingasunik ukioqaleruni sulileqqinnarniarluni.

Aantuut Qaasuitsup Kommuneqarallarmat 2011-imi piorsarsimassutsikkut nersornaaserpara, ukiullu marluk matuma siorna 100-liineranut atatillugu Nersornaammik siilviusumik nersornaaserneqarpoq.

Aantuut nakkaannajasuunngitsuunini ilisarnaatigalugu aammalu nunarsuarmi nalinginnaasuunngitsumik angusaqarsimalluni naggatissani tikillugu immikkuullarissuseqartuaannarpoq. Uteriissuseqarnermigut pisortanit utoqqalinersiatigut ikiorserneqarnissani kissaatigisimanngilaa. Aatsaallu 101-inik ukioqarluni utoqqaat illuanni najugaqalerami utoqqalinersiaqalernissani naapertuuttut nalilerlugu pisartagalerpoq.

Qujanartumik inuunerisimasamini aqqusaarsimasaminik oqaluttuartarneri naqitani, assini, radiomi tv-milu toqqortaatigineqarput. Aantuullu toqussi tikillugu immikkuullarissuteqarnera eqqaasarumaarparput.

Anthon Geislerip eqqaaneqarnera ataqqinartuuli.

Palle Jerimiassen
Avannaata Kommuniani borgmesteri