Ilulissani Kofoeds Skoleqalernissaa isumaqatigiissutigineqartoq

- Isumaginninnikkut sullitat inersimasut atugarliornerpaat suliffeqarfinnit sulisorineqarusunnginnermikkut pakatsisinneqartuartarnerat isumaginnninnikkut sullissisut sulinerminni siumortuarpaat. Maannalu alloriaqqinnikkut imminnut ikiorsersinnaalersillugit ikiorsiinialerpugut, taamalu ikiorneqartussat toqqissisimaffigisinnaasaminni sulisinnaalersinnerisigut inuunerminnik suliarinnissinnaalersinneqassapput. Taamaammat Ilulissani Kofoeds Skoleqalernissaa isumaqatigiissutigaarput, Palle Jerimiassen Avannaata Kommuniani borgmesteri oqarpoq.

Avannaata Kommunianeersut Nuummilu Kofoeds Skolep immikkoortortaaneersut Ilulissani immikkoortortaqalernissaq siorna ukiakkulli eqqartueqatigiissutigisalerpaat. Qulaajaanermi kommunimeersut ilaatigut paasivaat nunatsinniit Danmarkimut nuuttartut amerlanerpaartaat 17 %-iusut Ilulissaneersuusut Nuummeersut 14 %-iusut tullersortigalugit.

Qinersereernerup kingorna qaqinneqassaaq
- Kofoeds Skoletut ittumik pisariaqartitsineq qanoq annertutiginersoq paasinialeruttorparput. Isumaginninnikkut sullitat kommunimit ikiorsiissutinik pisartagaqarnermik saniatigut Allorfimmi katsorsartinnissamut periarfissaqarput, angerlarsimaffeqanngitsunullu unnuisarfimmik qaammatit arlalialugit matuma siorna pilersitsivugut. Maannalu Kofoeds Skolemik pilersitsinialerpugut, pisariaqartinneqarmat aammalu sullitat pisortanit pisartagaqartiinnarnagit periarfissaq tamanna angusaqarluarnarnerusutut misilittakkatigut ersersinneqareermat, borgmesteri oqarpoq.

Borgmesteri ilisimatitsivoq Kofoeds Skolemik pilersitsinissamik kommunalbestyrelsimut saqqummiussinissaq qinersereernerup kingorna piumaartoq. Tamatuma tungaanut Ilaqutareeqarnermut Ingerlatsivimmeersut aammalu Inuussutissarsiornermut immikkoortortaqarfimmeersut qulaajaanerminnik inaarsaassapput.

Gudmundur ”Gujo” Thorsteinsson Nuummi Kofoeds Skolemi ittuusoq ulluni kingullerni Ilulissaniippoq kommunimeersunik oqaloqateqarnermi saniatigut isumaginninnikkut sullitat atugarliornerpaat qanoq periarfissaqartinneqarnersut paasiniarlugu. Oqaluttuarpoq Kofoeds Skole Københavnimi pilersinneqarmalli Danmarkimi nunatsinnilu atuarfinnik pilersitsisoqarsimasoq, Kofoeds Skole Nuummiittoq aningaasaateqarfinnit tapiiffigineqartartutut decembarip aallaqqaataani 2015-imi atuutilersimalluni aammalu 2019-imi januaarip aallaqqaataani nammineq ingerlattutut Kommuneqarfik Sermersuumit ingerlatsinikkut tapiiffigineqartarluni ingerlalersimalluni. Aammattaaq Kofoed Skole Københavnimiittoq Europap qeqqani kangianilu immikkoortortaqarfinnik 25-nik ammaaqataasimavoq.

- Imminut ikiorsersinnaalersitsilluni ikiorsiineq upperiartuinnarpara. Sullitat atugarliornerpaat ikiorserneqarnissaat inuiaqatigiinni tamanit peqataaffigineqarsinnaasuuppat politikkikkut usorsisimaarnerujussuussagaluarpoq, taamaasiornitsigummi pitsaanerusumik inuuneqalernissamut tunngavissiinissamut sumiiffissaqartitsilerlutalu katersuuffeqalersitsissagaluarpugut, pingaartumik sullitani inuusuttut amerliartuinnartillugit. Ajornartorsiummik aaqqitassaqanngilagut suliassamilliuna suleqatigiilluta isumaginiagassaqartugut, Gudmundur ”Gujo” Thorsteinsson isumaqarpoq.

Kofoeds Skole nammineq ingerlasutut aaqqissuussaasuuvoq aammalu tullimut asanninnermik susassareqatigiinnermillu aallaaveqarluni sullissiviuvoq – oqaatsitigut nalunaajaanikkuunngitsoq kisiannili atuarfiup sammisassaqartitsiviini naakkittarnermik ataqqinninnermillu ersersitsisarnikkut.

Allattoq assiliisorlu: Káte Hansen, khan@avannaata.gl