Aallaqqaasiullugu eqqaaneqassaaq, soorlu amma aviisimut ilanngutassiami atuarneqarsinnaasoq, Avannaata Kommunia Namminersorlutik Oqartussanit immikkut ittumik akuersissuteqarput, eqqakkanik nakkutigineqarlutik ikuallaasinnaanermut tunngasumut. Taamaattumik ikuallaanermi unioqqutitsisoqanngilaq.
Eqqakkanik ikuallaaneq utaqqiisaasumik aaqqiissutaavoq, periutsimut nalinginnaasumut ilassutitut atorneqartoq, ingerlatsivimmi sulisut poortuisarput eqqakkallu immikkut poortortarlugit siunissami passunneqarnissaannut toqqorsivinnut inissittarlugit.
Uummannami maannakkorpiaq eqqakkanik tigooraavimmik nutaaliamik sanasoqarpoq 9,6 mio. kr.-nik nalilimmik. Upernavimmi aamma eqqakkanik tigooraavimmik nutaamik sananissaq pillugu pilersaarusiortoqarpoq, maannakkorpiartaaq eqqaavissuassap tungaanut aqquserniortoqarluni.
Avannaata Kommunia eqqakkanut ajornartorsiutit pillugit siunissaq ungasinnerusoq eqqarsaatigalugu aaqqiissutissanik ujartuineq sulissutigaa. Ikuallaaviit mikinerit takunikuuagut sulili Namminersorlutik Oqartussanit systimimut tassunga atuinissamut akuersissut suliarineqarnissaa utaqqineqarpoq.
Tamakku saniatigut eqqaaveqarfiit ataasiakkaat pitsanngorsaaviginiarlugit tigussaasumik pilersaaarusiornissaq sulissutigaarput, piffinni ataasiakkaani pissutsit piviusut naapertorlugit.
Soorunalimi ajuusaarnarpoq, Uummannami ingerlatsinermi sulisut anersaartorfinnut illersuuteqaratik ikuallaasut takuneqarsimaneri. Taamaattumik Avannaata Kommuniata ingerlatsinermi sulisut eqqaasissutississimavai, sulisut eqqakkanik ikuallaasartut tamaasa illersuutit atortassagaat soorlu aamma atornissaannut ilitsersorneqareertut.
Aviisimi ilanngutassiami Sermitsiaq. AG-imi isumaqamisaartoqarpoq, Uummannami eqqakkanik ikuallaaneq pisoq, Avannaata Kommuniata kommunit ataatsimoorlutik eqqagassalerineq ESANI-imi ilaannginneranit sunniutaasoq.
Isumaqarpugut pingaaruteqartut paasissallugu, ESANI-mut ilaasortannguinnarluta ajornartorsiutigut qaangerunnanngikkivut. Sunaluunniit iluarsiissut toqqarutsigu, kommunip iluani ammaannartumik ikuallaasarneq suli ingerlanneqartarallassasoq sivisulaartumik. Kommunip iluani suli eqqakkanik ikuallaasarneq ingerlatiinnarneqartussaagallarpoq, eqqakkat qaleriaatinnginnissaat qulakkeerniarlugu aammali nunaqarfinnut siaruaatinnginnissaat pillugu imaluunniit timmisartut minniarnissaannut navianartorsiunnginnisaat taamaalillunilu timmisartornissat unitsinneqarnissaat pinaveersaartinneqassammat.
Piffissami tassani kommunimi illoqarfiit nunaqarfiillu tamaasa amerlasoorpassuarnik aningaasaliiffigisariaqarput. Soorlu assersuutigalugu eqqakkat poortorneqartussaanerat piffinni inoqarfiusuni pisinnaanngilaq kisianni amerlanertigut eqqaavissooreersumi pisussaalluni. Taamaaliniaraanni nunaminertami nunagissarsimasumi tikeriaannarmi kallerup inneranut atassuteqartumi pisussaavoq. Tamakku saniatigut eqqakkat poortoreersut ukioq naallugu toqqortarissavavut, ajornanngippat nammineq halimi pigisami tulluartumilu. Tassungalu atatillugu aamma nunaqarfiit aqquserngi eqqakkat angallannerinut naapertuuttussaassallutik. Nunaqarfitsinni amerlanerni tamakku periarfissaanngillat. Taamatuttaarlu aallaqqaataanilli isuma imaassimammat, aningaasaliissutit tamakku kommunip kisimi suliassaralugit nammatassarigaat, ullormiit ullormut naammassineqarsinnaanngillat.
Avannaata Kommunia ataatsimut eqqakkanut suliaqarnermut peqataanissani kissaatiginngimmagu, imaanngilaq, Avannaata Kommuniata eqqakkanik suliaqarneq avatangiisimut ajoqutaannginnerusumik pitsaanerusumillu suliarerusunngikkaa. Ataatsimoorussamik aaqqiissuteqarnissaq kissaatigaarput, tassa Nunarput tamakkerlugu eqqakkanik suliaqarneq ajornartorsiutaammat. Taamaakkaluartorli aamma ataqatigiittariaqarput, logistikkikuut aamma aningaasaqarnikkut.
Tamakku saniatigut Avannaata Kommuniani aamma isumaqarpugut, pingaaruteqartoq ikuallaasarneq kisiat aallunneqarnissaa pisariaqanngitsoq. Eqqakkat suliarineqarnissaannut tunngatillugu avatangiisimut ajoqutaannginnerusumik suliariinnarnagit aammali atoqqiisarneq allamullu atuisarneq aallunnerusariaqaripput.
Avannaata Kommuniani Piujuaannartitsineq assut sammineqarpoq taamaattumillu Avannaata Kommuniani takorluugarput nutaaq Avannaata Kommuniata Pilersaarutitut periusissiaq 2020 tunngavigalugu tassaavoq ’Piujuaannartitsisumik ineriartortitsineq ataatsimut’.
Palle Jerimiassen