Kommunalbestyrelsimi ataatsimeeqqaarnissaq inissitassanit kinguarsarneqarpoq

Qinersinermut inatsit naapertorlugu kommunalbestyrelsip nutaap qinigaaffia maajip aallaqqaataani aallartittussaagaluarpoq, pissutsilli maannakkutut itsillugit kommunalbestyrelsimi ilaasortat ataatsimiigiaqquneqaqqaarnissaat maajip ingerlanerani pisussanngortutut isikkoqarpoq.

- Qinersinermi paasissutissat illoqarfinnit nunaqarfinnillu tamanit suli pissarsiarinngilagut, taamaammallu qinersinermi taasinernik kisitseqqissaarinerit naammassisinnaanngikkallarpagut. Tamatuma saniatigut Qinigaasinnaanermut Naliliisartut qinigaasimasut qinigaasinnaanerannik nalilersuinerat suli utaqqivarput. Suliallu taakku aatsaat naammassineqareerpata kommunalbestyrelsimi ilaasortat ataatsimiigiaqquneqassapput, tamatumalu maajip ingerlanerani pisinnaanissaa naatsorsuutigaarput, Nick Nielsen, Avannaata Kommuniani pisortaaneq oqarpoq.

Qinersinermi paasissutissat Ilulissaneersut nunaqarfiineersullu aamma Uummannameersut nunaqarfiineersullu kommunip Ilulissani allattoqarfianit pissarsiarineqarsimalereerput, taamalu misissorneqalereerlutillu taasinernik kisitseqqissaarisoqalereerpoq. Qinersinermi paasissutissat Qaanaameersut nunaqarfiineersullu aammalu Upernavimmeersut nunaqarfiineersullu angallannikkut akimmiffeqarneq pissutigalugu suli pissarsiarineqanngillat.

Maannamut borgmesteriusoq Palle Jerimiassen kommunalbestyrelsemi sivisunerpaamik ilaasortaasutut kommunalbestyrelsimi ilaasortanngorlaat inissititernissaannut ataatsimiigiaqqusisuussaaq. Qinigaasinnaanermut Naliliisartut nalilersuinerat naammassineqariarpat aammalu Avannaata Kommuniani qinersinermut siulersuisuisa qinersineq pillugu naammagittaalliuutaasinnaasut pillugit kiisalu kommunalbestyrelsimi ilaasortat qinigaasinnaatitaanerat pillugu suliaat naammassineqariarpata ataatsimiigiaqqusisoqarsinnaalissaaq.

Partiit Siumut aamma Naleraq isumaqatigiissutissaminnik ullumi atsioqatigiissapput.

- Nalerarlu isumaqatigiissutissarput atsioriartorlugu Ilulissanut tikeqqammerpunga. Oqaatigisinnaavara isumaqatigiissut malillugu uanga borgmesterinngussaanga aammalu borgmesterip tulliatut siullertut atorfik Naleqqamit pissarsiarineqassalluni. Borgmesterip tulliatut aappaattut atorfik kikkunnit pissarsiarineqassanersoq suli inissinneqanngilaq, Sakio Fleischer, Siumut oqarpoq.

Siumut aamma Naleraq isumaqatigiissutissaminnik ullumi nalunaaqutaq 13.00 Piorsarsimassutsikkut Illorsuarmi Sermermiuni atsioqatigiissapput.

Allattoq assiliisorlu: Káte Hansen, khan@avannaata.gl