Illoqarfiup avannamut ineriartornera
Maannakkorpiaq ilisimatuut suleqatigiit ilarpassuisa Ilulissat avannaani narsaamanersuaq paasiniaaffigileruttorpaat. Ima ingerlanneqarpoq, SnowTEM metode (Transient ElectroMagnetic instrument) taaneqartartoq ikiortigalugu, qupinnguallannernik elektromagnetiske-usunik nunap ataani innaallagissap akimmisaarnera uuttorlugu, taamaalillunilu nunap ataani imeq qanorlu tarajoqartiginerata il.il. atatigiinnera oqaaseqarfigisinnaanngorlugu. Tassannga nunap qeriuaannartup aakkiartornera ilutigalugu qanoq nunap ataa ilissanersoq ilusiliortoqarsinnaalissaaq.
Avannaata Kommunianut paasissutissat taakku imaassinnaavoq iluatsinnangaarmata nallerneqarsinnaanngitsut, suliniut mittarfittaassamut uiggiullugu, nutaamik mittarfittaassap aqqusinniornissaanit pilersaaruteqartoqarpoq, taakkulu saniatigut siunissami illoqarfiup ilassaanit nutaamik sanalersaartoqarluni.
”Qillerisimavugut ilaatigut mittarfittaassap aqquserngiornissaata pilersaarusiorneqarnerani, qillerinikkullu qaqitat takutippaat, annertoorujussuarmik sikumik akoqartoq” Thomas Ingeman-Nielsen, Arctic DTU oqaluttuarpoq. Sikumik akoqarnerujussua isumaqarpoq, kiassutsip sakkortusiartornera ilutigalugu imerlu qerrakoq aakkiartorneranit nunap ataata kivinissaanut ilimanaatilerujussuusoq.
Imeqarfiup naqqani tarajoq
Tassa uuttuinerit piffimmi aalajangersimasumi sanaartornissaq ajunnginnersoq ajornersorluunniit paasissutissiiginnarneq ajorput.
”Narsaamanertarsuarmi imeqarfiullu qulaani uuttuinikuuvugut, uuttuinitta paasinarsitippaa nunap sananeqaataai qaleriiaat tarajullit piffimmi annertoorujussuarmiittut aamma imeqarfiup naqqani. Taamaalilluni soqutiginarsivoq nuna qeriuaannartoq aalerpat imissamut qanoq sunniuteqarsinnaanersoq. Mittarfiup eqqaani qillerigatta takuneqarsinnaavoq imeq nunamiittoq immamisut tarattumik akoqarsinnaasoq. Imeqarfiup eqqaa aamma taamaassimanissaanut ilimagaarput qillerinitsinnullu atatillugu qillerinikkut qaqitat angerlaallugit misissoqqissaarnissaat pissaaq, taamaalilluta misissukkat tatiginassusiinut ilimagisatsinnut naleqqiullugu paasisaqarfigissavavut,”, Thomas Ingeman-Nielsen, Arctic DTU-meersoq oqaluttuarpoq.
”Ilulissat tassaavoq qangarsuaq immap naqqanit pinngortoq taamaattumik immap naqqani kinnerit tarajullit takussaapput qeriuaannartumi sikumit akulinnit qallikkat. Tassani uuttuinissatsinnut toqqaasimanitta patsisaasut ilagaat, ilisimatusarnerup silarsuaani soqutiginartuummat soorlu aamma Sisimiuni tarajoq annertooq nunamit akuiarneqarsimasoq eqqaaginnarlugu”, Thomas Ingeman-Nielsen oqaluttuarpoq.
Suleqatigiinneq ingerlatiinnarneqassaaq
”Angerlarutta paasissutissat paasiniaqqissaasavavut ilusilersukkavullu naatsorsorlugit. Ukiup naalernerani naggataarutaasunik inerniliussanit amerlanernit peqalernissarput naatsorsuutigaarput. Taava inerniliussat tamakku Avannaata Kommunianut ingerlateqqissavavut, namminerlu qanoq iliuuseqarfiginissaat aalajangerumaarpaat”
Suliniut 2023-p tungaanut ingerlatiinnarneqarnissaa pilersaarutaavoq.
Allattoq: Nikolaj Sander
