Avannaata Kommuniani kommunalbestyrelsimi ilaasortartaat qinigaasinnaanermut misissuivigineqarnerisa naammassineqarnerat aammalu ilaasortat tamarluinnarmik qinigaasinnaatitaanerat Qinigaasinnaanermut Naliliisartut apriilip 28-ani nalunaarutigaat.
- Malittarisassat naapertorlugit qinersinermut tunngasut tamarmik naammassineqareerpata aatsaat kommunalbestyrelse nutaaq inissititersinnaalissaaq. Qaanaamit pigisaanillu aammalu Upernaviup nunaqarfiinit Nutaarmiunit Innaarsunnillu qinersinermi paasissutissat suli amigaatigaavut, Nick Nielsen Avannaata Kommuniani pisortaaneq oqarpoq nangillunilu:
- Air Greenland suleqatigalugu angallanneqarnissaat ataqatigiissaarpaarput, timmisartuutileqatigiinniillu qinersinermi paasissutissanik assartuiniarluni immikkorluinnaq suliniuteqartoqarpoq, tamatumanilu Tele Postip qulimiguulimmik attartugaa aamma akuutinneqarpoq. Qinersinermi paasissutissat pissarsiareriarutsigit taasinernik kisitseqqissaarinerit naammassisinnaalissavagut, suullu tamarmik iluatsissappata kommunalbestyrelsimi ataatsimiinneq siullerpaaq sapaatip akunnerata tulliani pisinnaalissaaq.
Nick Nielsen ilassuteqarluni oqarpoq, kommunalbestyrelsip siullerpaamik ataatsimiinnissaa Uummannami borgmesterinngortussap Sakio Fleischerip illoqarfigisaani pissamaartoq.
Siumut aamma Naleraq kommunalbestyrelsimi suleqatigiinnissamik apriilip 22-ani atsioqatigiipput, tamatumanilu Siumut borgmesterinngortitsissaaq aammalu borgmesterip tullersortaatut siullertut atorfik Naleqqamit pissarsiarineqarluni. Kikkut borgmesterip tullersortaatut aappaattut atorfinitsitsissanersut suli qulakkeerneqanngilaq.
Allattoq: Káte Hansen, khan@avannaata.gl