Palle Jerimiassen borgmesteritut qinigaaqqippoq

Borgmesterinngorlaaq Palle Jerimiassen ukunannga qulingiluaasunit taaguunneqarluni qinerneqarpoq: Atassummit taasinerit marluk, Inuit Ataqatigiinnit pingasut, Demokraatinit taasineq ataaseq, Naleqqamit taasinerit marluk kiisalu Palle Jerimiassenip taasinera ataaseq.

Siumumit kommunalbestyrelsimi ilaasortat arfineq-marluk Minik Høeg Dam attaviitsutut kommunalbestyrelsimi ilaasortaasoq arfineq-pingatsiullugu Sakio Fleischerip borgmesterinngortinneqarnissaa siunnersuutigigaluarpaat.

- Partiit tamaasa sinnerlugit borgmesteriussaanga. Partiit akornanni naapitseriaalluni suleriuseqarneq kommunalbestyrelsip siuliani ileqqorilluarsimasarput aalluteqqissavarput, aamma kommune ataasiusoq sullisissavarput, Palle Jerimiassen attaviitsutut borgmesterinngortoq oqarpoq.

Jens Ole Nathanielsen Inuit Ataqatigiinneersoq borgmesterip tullersortaatut siullertut qinigaavoq. Ataatsimiinnerup aallartilaarnerani Anthon Frederiksen borgmesterip tullersortaatut aappaattut qinigaagaluarpoq, kingusinnerusukkulli Siumumit erseqqissaatigineqarpoq, borgmesterip tullersortaatut aappattut atorfik Aqutsinermut Inatsit tunngavigalugu illua’tungiliuttunit inuttalerneqartussaasoq. Tamanna tunngavigalugu misissuisoqareernerata kingorna Sakio Fleischer borgmesterip tullersortaatut aappaattut inissinneqarpoq.

- Amerlanerussuteqartut borgmesterimik taasinerat ataqqivarput. Borgmesterinngortoq tullersortaalu pilluaqquagut. Qinersisartut amerlanerpaat tunuliaqutaralugit kommunalbestyrelsimi illua’tungiliuttut sulinissarput naatsorsuutigineqassaaq, Jakob Petersen Siumut sinnerlugu oqarpoq.

Oqaluuserisami allami Inuutersuaq Ulloriaq Løvstrømip kommunalbestyrelsimit tunuarniuteqarnera oqaluuserineqarpoq akuerineqarlunilu, tamatumalu kingunerisaanik Jens Kristian Therkelsen kommunalbestyrelsimi ilaasortanngorpoq. Inuutersuaq Ulloriaq Løvstrømip ilaquttaminik aallusserusunnini pissutigalugu tunuarniuteqarpoq.

Oqaluuserisassami allami aamma Jens Napãtôk’-p kommunalbestyrelsimi sulinngiffeqarusunnera oqaluuserineqarpoq akuerineqarlunilu. Jens Napãtôk’-p ilaquttani pissutigalugit tunuarniuteqarpoq. Edvard Aqqaluk Heilmann sinniisussatut siullertut Jens Napãtôk-p sulinngiffeqarnerani kommunalbestyrelsimi sinniisuussaaq.

Allattoq asiiliisorlu: Káte Hansen, khan@avannaata.gl