airplanebooksbriefcase business cogs cross election entertainment fish house law lockmedicalpeopleselfservices socialtax

Innaarsunni atuarfittaarnissaq atuarfimmi aqutsisup qilanaaraa

Upernaviup nunaqarfiisa ilaanni Innaarsunni atuarfiliaq ilusinikkiartorpoq. Atuarfimmi aqutsisup atuarfittaarnissaq qilanaaraa, ullumikkummi atuarfik aamma oqaluffiutigivoq.
24. juni 2021

Innaarsunni atuarfimmi aqutsisup Pia Kristensenip atuarfittaassartik 2023-mi naammassineqartussaq neriuuteqarfigilluarpaa. Atuartitsisoqatinilu pingasut – taakkunannga marluk timelæreriusut – aammalu atuarfimmi atuartut 28-t nunaqarfimmi atuarfimmi oqaluffiutigisumi pitsaanerpaanik atugaqanngillat.

- Taamanikkornissaanut atuartut Atuarfitsialammi piumasaqaataasunut naapertuuttunik atuartissinnaalissavagut. Pissutsit maannakkutut itsillugit atuartut fysikimik, pinngortitalerissutinik aammalu atuartitsissutinik toqqartarissanik – soorlu timersornermik, iganermik, nipilersornermik, mersornermik allanillu atuartinneqarneq ajorput. Atuartitsissutit taakku atuarfittaassaq naammassineqarpat neqeroorutigineqalersinnaassammata alloriarnerujussuussaaq, Pia Kristensen oqarpoq nangillunilu:

- Massakkulluunniit atuarfik ualikkut klubitut atorneqartartillugu inuusuttunut ilinniagaqanngitsunut suliniut NUIKI aqqutigalugu ilinniagaqalernissaannut aqqutissiuusseqataasinnaanngilagut. Atuarfittaassaq naammasseriarpat NUIKI aqqutigalugu atuartitsisoqarsinnaaneranut periarfissaqalissaaq, tamatumalu saniatigut atuartut angajulliit atuarnerminnik nangitsiartorlutik illoqarfiliartinngikkaluarlugit nunaqarfimmi atuartiinnarneqarsinnaassapput.

Suliniut NUIKI, Nunaqarfinni Ilinniartitsinermik Kivitsineq, nunaqarfinni inuusuttunut ilinnigaqanngitsunut qaffasinnerusunik angusaqalernissamut taamalu ilinniagaqalernissamut neqeroorutaavoq.

Sulinermi atukkat pitsaanerusut


Atuarfik naammassineqarpat atuarfiup aqutsisua suleqataalu sulinermi atukkatigut aamma pitsaanerujussuarnik atugaqalissapput.

- Atuarfitsinni pissutsit nukillalaarnartaqaat. Soorlu sapaammi naalagiartussaqartillugu atuartitsinermi atugassanik iikkanut nivinngaasimagaangatta tallimanngornikkut atuartitsineq naagaangat piiartariaqartarpagut, taavalu ataasinngornermi nivinngaassoqqittariaqartarlugit.

- Tamatuma saniatigut ini naalagiarnermut atorniarneqartillugu naalagiarnermi atuaasartup nerriviit issiaviillu annissortariaqartarpai naalagiarnerlu naammassigaangat eqqussuuteqqittariaqartarlugit, pissutsillu ukiorpassuarni taamaassimapput, atuarfimmi aqutsisoq nassuiaavoq. Ataasiinnarmillu ernummateqarpoq:

- Ilinniartitsisunut illu ataasiinnaavoq, taannalu siunissami ilinniartitsisunik ilinniarsimasunik atorfinitsitsiniaanermi periarfissalutsitsisinnaavoq.

Innaarsuit 159-inik inoqarput.

Assit ataani takuneqarsinnaapput.

Allattoq: Káte Hansen, khan@avannaata.gl
Assit: Teknikkeqarnermut Ingerlatsiviq aamma Pia Kristensen

Innaarsuinni atuarfittaassaq ilusinikkartorpoq.

 

Nunaqarfimmi atuarfissaq takorluugassianngorlugu.

Atuarfik taama isikkoqassaaq.

 

Innaarsunni atuarfik oqaluffiutigisoq.

 

Naalagiartoqassatillugu atuarnermi atorneqartut issiaviit nerriviillu ilanngullugit tamarmik piiarneqartarput.

Naalagiartoqareeraangallu ini atuartitsivinngortinneqaqqittarpoq.