Isaariaata silataani qulisami inituumilu illoqarfiup innuttai kaffillerfigineqarput, sulisullu aamma allat kajumissutsiminnik sulisut kaffeqarluarnissaanik, teeqarluarnissaanik qalarlaanillu boorloqarluarnissaanik qulakkeerinninniarlutik ulapputtunnguupput. Takornariat eqimattakkaat kissartutuullutillu boorlutuupput. Uangali illorsuarmut isernissara pileriginermik aalajangerpunga kingusinnerusukkut tiitorlungalu boorlutorumaarlunga.
Illorsuarmi ungataanilu avatangiisinik nakkutilliisussap Aron Petersenip pooqattamik akeqanngitsumik tunivaanga. Pooqattami ilaatigut allassimavoq kaminnut atorneqarsinnaasoq. Illorsualiaq pillugu quppersagaliat kalaallisut tuluttullu oqaasertallit pooqattannut aamma ikivakka, isernissannullu utaqqeqqissinnaanngivippunga.
Iserluni allaanngilaq soorlu illorsuup iluanut noqinneqarluni. Paarlersuarmut appakaalluni arpaatit kamippaallu peerneqarsimasorpassuit natermi kisimik takoqqupput. Issiaviliaq ulamersoq qisummik sanaaq assigalugu iikkat qilaarlu qullernik ersinngitsunik avissaaqutaannallit qisuupput. Arnat marlluk issiavimmi ingillutik kamillartilerunarlutilluunniit atisinialerpasipput. Illuatungaani iikkap ataatungaani natermi arpaatit kamippaallu peerneqarsimasut sanileriiaarput. Meeqqat inuusuttullu nikuiinnarlutik kamillartiterput. Uangalu kamippakka piikkakka pooqattamut pissarsiareqqammikkannut unermiliussimasannut ikipallariarlugit iserniapallappunga.
Piorsarsimassutsikkut Illorsuarmi Sermermiuni pisussanik ataqatigiissaarisoq Nukannguaq Mathiesen isertunik tikilluaqqusisuuvoq, nassuiaavorlu illorsuarmi pisiniarfik ullut tamaasa ullaap tungaani nalunaaqutaq aqqanermiit arfernup tungaanut ammasarniartoq, aammalu pisiniarfia aatsaat aqaguani ammarumaartoq.
Nunatsinnut tunngasunik atuakkiat assiliartalersukkat sumi tamaani orpiit kanaartapiluunersuini kipparissunngorlugit ilusilersukkani meterillu missaanni portutigisut qaavinut qaleriaarlugit iliorarneqarsimapput. Puiaasat imerfissiat qulingiluat illorsuup ilisarnaataanik allallit assigiinngitsunillu similersukkat kanaartarsuit ilaanni kusanasaarlugit inissinneqarsimapput. Ilaat qisummik similik maluginiagassaanngitsuunngilaq. Imerfiliat kusarnarluinnartut ikinngitsut takornariat pooqattaannut ikineqartarumaarput qularnanngilaq, eqqarsarpunga.
Nunatta naasui panertut akimut ersittuni kusanasaarlugit poortorneqarsimasut, taratsut nunatsinneersut allalllu kusanartunik puullit iikkap eqqaani inissinneqarsimapput. Qaqorsaatit kippareqqissaat nunatsinni sanaat ingerlaqqilaarluni siumugassapput. Ilaana, nioqqutissatsialaat illoqarfimmiunut minnerunngitsumillu corona ulluinnarsiutigilersimasarput qaangiutiimippat takornarianut tunisaalluarumaarput.
Inimi tassaniipportaaq sutorniartarfik. Nerriviit issiaviillu inoqanngitsut nalunaarpaat sutorniartarfik suli ammarsimanngitsoq. Ammarsimaleriarpalli igalaarsuartigut naqqaniit qilaamut portutigisutigut pinngortitamut iluliarsuarnullu portusoorsuarnut isikkivilerluni kissartutugannaanik najoqqaasoqarsinnaajumaarpoq. Nerriviit, issiaviit qulliillu iluserilluinnartut manngertuminermik natilianut tulluarluinnarput. Illorsuarmi naqqit tamakkerlugit sallilikkiaapput, taakkulu illersorniarlugit takornariat kamillaqqaarlutik isersinnaatitaapput.
Takornariat uattuulli alloriarnerit tamaasa takusassanik tupigusullutik namminneq silarsuarminniiginnakasillartut takuneqarsinnaapput. Ila, takusat suli ilaartorusunnaraluaqaat, illorsuarmili kusanartuliami saqqummersitani takusassat oqaasiinnartigut oqaluttuarissallugit amigarsinarpoq. Taamaammallu assit ataani takuneqarsinnaasut namminneq oqaluttuartariaqarput.
Ataaserli qularnanngilaq; Kangiata Illorsua illorsualiaavoq kusanarluinnartoq alutornaqateqanngitsunik saqqummersitalik. Illorsualiaq nunarsuarmi naliitsuliat ilaat sapanngat nuisat arfiniliusussat siullersaat nunatsinni assigiinngitsutigut pisuunnguallaataasussaavoq.
Allattoq assiliisorlu: Káte Hansen, khan@avannaata.gl
Ullut arlalialuit tamatuma siorna illorsuarmik tunniussineq pivoq Realdaniap Aningaasaateqarfianiit Namminersorlutik Oqartussanut, tassanngaanniillu Greenland Visitor Centerimut. Saamerlerniit: Pele Broberg, Inuussutissarsiornermut, Niuernermut Nunanut Allanut Silallu Pissusaata Allanngoriartorneranut Naalakkersuisut, Palle Jerimiassen Avannaata Kommuniani borgmesteri, Múte B. Egede, Naalakkersuisut siulittaasuat, Pauline Knudsen, Greenland Visitor Centerimi aqutsisoq, Elisabeth Momme, Kangiata Illorsuani aqutsisoq, Johan Carlsson, JAC Studios, Lisbeth Karline Poulsen aamma Christine Lindgren marluullutik Kangiata Illorsuani sulisuusut.
- Ullorsiorluaqaagut 1000-illu missaannik pulaartoqarpugut, amerlasuullu boorlunik arlaleraartaqaraluartut utoqqaat illuarmiut, napparsimmaveqarfik, angerlarsimaffeqanngitsut unnuisarfianniittut allarpassuillu ualikkut najoqqagassaminnut boorlussaqartinneqarput, Elisabeth Momme, Kangiata Illorsuani aqutsisoq oqarpoq.
Akimut ersittuliat takusassartallit iluliarsuartut ilusillit iluini aalasuliat eqqumiitsuliallu saqqummersinneqarput.
Akimut ersittuliat ilaasa iluani iluliarsuit umiarsuarlu.
Sermit untritilinnik arlalinnik pisoqaassusillit qulaani, ataanilu isiginnaarummik toorsilluni oqaluttuassartaa atuarneqarsinnaavoq.
Meeqqat inuusuttullu isarussatigut silarsuarmut piviusorpalaartumut pulallutik sermersuarmut timmisartoriarlutik qamuteralannik angalaqqillutik sermersuup ataani sullorsualiamut sermersuup oqaluttuassartaa takornariarfigisinnaavaat.
- Takunnittut illorsuarmik saqqummersitamillu taamattunik takusatik tupaallaatigaat, nunanilu allani takusaminnut assersuuttarpaat. Illoqarfimmi innuttaasut illorsuaq sumiiffimminnik inuunerminnillu oqaluttuartoq tanngassimaarutigigaat isumaqarluinnarpunga, Elisabeth Momme, Kangiata Illorsuarni aqutsisoq oqarpoq.
Anaanaq pannilu oqaluttuarisaanermi pisimasumut utersaarput.
Filmertarfimmi sermip oqaluttuassartaa isiginnaarneqarsinnaavoq.
Taavalu Kangiata Illorsuata qalianut qaqivugut.
Qaliani sivingajaartumi nikorfaniarnertariaqarpoq.
Taavalu takornariarneq nunami aqqusiatigut Sermermiunut iluapiluunersuit qanilliartorlugit ingerlaqqittoqarsinnaavoq…