Jens Kristian Therkelsen oqaluttuarpoq pingaartumik piniariartarfiit eqqaanni saligaatsuutitsinissamik pingaartitsini tunngavigalugu naammagittaalliuummik allagaqarsimalluni.
- Facebookimi piffissami kingullermi oqallittoqarnerani paasinarsivoq, eqaloqarfik Sermerlanniittoq assut iluasaanngiffiusimasoq, kuuani qassutit, tasertaani aalisakkanut karsi, aamma oqaatigineqarluni tasersuarmi nilertortoqattaartoq (kitaamiusoorlugu aquuteralak) gummibådimik aammalu siorna sakkortuumik kuummi eqalunniartoqarsimasoq qoqerlugit seqqortaarlugit, Jens Kristian Therkelsen Siumut sinnerlugu Avannaata Kommuniani ilaasortaasoq oqarpoq.
Jens Kristian Therkelsenip innuttaasut pinngortitamik eriaginninnginnerat akuerineqarsinnaasorinngilaa. Facebooki aqqutigalugu oqallinnermi ilaatigut paasisimavaa, oqalliseqataasut piniariartarfiit eqqaanni eqqaavinnik amigaateqartut. Taamaammallu eqalunniartarfiit piniariartarfiillu eqqaanni allagartalersuinissaq eqqaavilersuinissarlu kommunimut kaammattuutigaa.
- Innuttaasut piniariartarfinni eqalunniartarfinnilu pinngortitamik eriaginninnerulernissaat anguniarlugu kommunimit iliuuseqarusuppugut. Maannamuugallartorli tamatta pinngortitameereeraangatta eqqagassaatitsinnik angerlamut oqqussisarnissarput isumagisariaqarparput, Iben Lykke Johansen, Avannaata Kommuniani avatangiisinut immikkoortortaqarfimmi atorfilittaq oqarpoq.
Avatangiisit innarlitsaaliorneqarnissaannik Inatsisartut inatsisaat naapertorlugu pinngortitaq avattangiisillu eriagineqarnissaat anguniarlugu silaannarmi, immami, sermimi, qaqqami, imaluunniit nunami mingutsitsisinnaaneq pinaveersaarneqarlunilu minnerpaaminiitinneqartussaavoq.
Inatsimmik unioqqutitsisoqartillugu akiliisitsisoqarsinnaavoq imaluunniit arsaarinnittoqarluni.
Inatsit pineqartoq tassaavoq: Avatangiisit innarlitsaaliorneqarnissaannik Inatsisartut inatsisaat nr. 9, 22. november 2011-meersoq.
Allattoq: Káte Hansen, khan@avannaata.gl