Kommunalbestyrelsimi partiit suleqatigiissut Inuit Ataqatigiit, Naleraq, Demokraatit, Atassut kiisalu borgmesterip Palle Jerimiassenip attaviitsuusup aningaasaqarnermut ataatsimiititaliamit najoqqutassiamik akuersisoqarnissaanik innersuussutaasoq akuersaarpaat. Tamanna kommunalbestyrelsimi immikkut ittumik ippassaq ataasinngornermi juulip tallimaani ataatsimiittoqarnerani pivoq.
Ataatsimiinnermi Siumut Minik Høeg-Dam attaviitsuusoq peqatigalugu najoqqutassiamik akuersinissamut tapersiipput, taamaattorli oqariartuutigaat, apeqqutit assigiinngitsut suli akineqarsorinngisatik akissutisinissaat siunertaralugu pisortaqarfinnit Karrat kangerluani innuttaasut ornillugit ataatsimeeqatigineqarnissaat toqqissisimanernerussasoq. Ilaatigut apeqquserpaat innuttaasut nuunnerisigut illut qimatat isaterneqarnissaannik siusinnerusukkut oqariartuutigineqarsimasut pillugit ilumut utoqqatsertoqarsimanersoq.
Illut isaterneqassanngillat
Najoqqutassiaq naapertorlugu illut Karrat kangerluaniittut qimanneqarpata isaterneqassanngillat, innuttaasullu illutik piumasaqaatitalinnik piginnartussanngorpaat.
Nammineerluni illuliat aammalu sanaqataaffigalugit illuliat piffissap ilaani erniaqanngitsutut akilersugassanngikkallartutullu taarsigassarsiaqarfiusut ukiut 20-t ingerlaneranni nalikilliartortinneqassapput. Innuttaasut tapiliussatut taarsigassarsisimasut akiitsutik akilersuinnassavaat. Innuttaasut illuutiminnik Namminersorlutik Oqartussanut imaluunniit kommunimut utertitserusunngitsut akiitsuminnik unitsitsigallarnissaq qinnuteqaatigisinnaavaat.
Boligstøtte aqqutigalugu illutaarsimasut akiitsuminnut, tapiliussatut taarsigassarsiaminnut ernianillu akilersuiinnassapput. Nammineerluni illuliaqartut aammalu sanaqataallutik illutaarsimasut assigalugit boligstøtte aqqutigalugu illuutillit akiitsuminnik unitsitsigallarnissamik qinnuteqarsinnaassapput.
Innuttaasunut Karrat kangerluanit nuukkusuttunut najoqqutassiami nuunnermi naatsorsuutigineqartussat eqqartorneqarput. Ilaatigut inoqutigiit utaqqiisaasumik najugarineqartussanut inigineqartussanullu nuunnerat, nuuffissavimmut angalanerat aammalu pigisaannik poortuillunilu initaassaannut assartuineq Avannaata Kommunianit aningaasartuutigineqassapput. Inoqutigiilli annertussusaat najoqqutaralugit pigisat assartugassat killeqartut kommunimit akilerneqassapput.
Innuttaasut nuunnerminni utaqqiisaasumik inissiffigisaminniinnerminni ulluinnarni aningaasartuutaasinnaasut, inigiligassavimminnut iserternerminni akiliut aammalu ineqarnermut akiliutit namminneq aningaasartuutigisassavaat.
Innutaasut Karrat kangerluanit nuuttut akornanni meqqerivinni utoqqaallu illuini inissiisoqassatillugit utaqqisuni sallinngortinneqassapput.
Aalisartut aalisarfeqarfiillu
Minik Høegh-Damip kommunalbestyrelsimi attaviitsutut ilaasortaasup paaserusuppaa aalisartut aalisarfeqarfimmut allamut nuunneranni aalisarsinnaanermut akuersissutaannut tunngasut qanoq pineqassanersut.
Aalisartut nuullutik aalisarfeqarfimmi allami akimmiffeqarsinnaalernissaat kommunalbestyrelsimi ilaasortat eqqartutsiarpaat. Ilaatigut aalisartut aalisarfeqarfimmi 46-imeersut – tassa Avannaata Kommunianit kujasinnerusumeersut aamma Qaanaameersut – aamma aalisarfeqarfimmi 47-mi, tassalu Upernaviup, Uummannap aammalu Qeqertarsuup Tunuani aalisarfeqarfiini aalisarsinnaatitaanerat akerlianillu aalisartut aalisarfeqarfimmi 47-meersut aalisarfeqarfimmi 46-mi aalisarsinnaannginnerat oqallisigineqarput.
Kommunalbestyrelsimi ilaasortat isumaqatigiissutigaat aalisartut Karrat kangerluanit aalisarfeqarfimmut allamut nuuttussat qanoq atugaqalernissaat misissuivigineqassasoq.
Allattoq: Káte Hansen, khan@avannaata.gl