Kullorsuami innutaasut namminneq eqqagassalerilersut

Kullorsuarmi eqqagassalerineq nunaqarfimmiunut ajornartorsiortitsisimasoq pillugu Avannaata Kommunia sulisunik eqqagassat pillugit Kullorsualiartitsissanngilaq.

- Angutit nunaqarfimmiut pingasut eqqagakkanik sivisujaamik aqquserngit killinginiissimasunik piiaallutik aallartereerput, taamaakkaluartoq eqqakkat assartorniarlugit kalittaatinik suli amigaateqarput, Beate Petersen Greve Kullorsuarmi nunaqarfimmi aqutsisuni siulittaasoq oqarpoq.

Kommunip eqqagassalerineq tamaat akisussaaffigisariaqarpaa
Nunaqarfimmi aqutsisut siulittaasuat nassuiaavoq, qamutit assakaasullit aserortooqqasarnerat ajornartorsiutaakkajuttoq eqqagassalerisunilu ukiuni arlaqalersuni atugaasimasoq aammalu tamanna eqqagassat aqquserngit killingini uninngatiinnarneqalertarnerannik kinguneqartartoq.

- Inuusuttut aalalluarlutik sulilluarlutillu eqqagassalerisaraluartut sorianngitsoq kalittaatinik ATV-nillu aserortoortarput. Ilaatigut qamutit motorillit kalaallisut aaqqissorneqartarput. Assersuutigalugu ATV-nut kalittaat aserormat kalittaata qilerummik qilersorlugu iluarsaappaat.

- Taamaakkaluartoq nunaqarfitsini aqquserngit ajorluinnartut sivingasullu aaqqiivigineqanngippata qamutinik motorilinnik aserortoortarneq ajornartorsiutaajuassaaq. Eqqagassalerisut traktorinik Pilersuisumit atornissaminnut periarfissinneqartarput, kisianni nal. 18.00-ip kingorna. Taamaattumik kommunip eqqagassalerineq tamaat akisussaaffigilertariaqarpaa, tamannalu innuttaasunit aamma oqaatigineqartuarpoq, Beate Petersen Greve oqarpoq.

Nunaqarfimmi aqutsisuni siulittaasup eqqagassalerisut suliunnaartartut paasisinnaanerarpai.

- Inuusuttut eqqagassalerisartut sulinerminni atugaat ilungarsunartaraluartut naammagittarnikkaajupput. Qimmiaqqallu angalaannartut eqqakkat puuinik kimmaallutik putoorinerisigut eqqagassat anartarfiillu imakuinik kueraaleraangata eqqagassalerisut atugaat suli ajornerulersarput. Innuttaasullu tipi eqqakkallu maaniinnarmiittut pillugit utaqqisinnaajunnaarlutik Facebooki aqqutigalugit naammagittaalliuleraangata eqqagassalerisunut nuannerunnaartarpoq ilaatigut soraarnerannik kinguneqartarluni, nunaqarfimmi aqutsisuni siulittaasoq oqarpoq.

Nunaqarfimmi aqutsisuni siulittaasoq nassuiaavoq nunaqarfimmiut utaqqiinnanngitsut.

- Qimmiaqqat pingasunik qaammateqalernissamik tungaannut angalaannartartut aamma arlaatigut iliuuseqarfigineqartariaqarput. Qimmiaqqat illutta eqqaani eqqakkat puuinik kimmaallutik kueraasimagaangata uanga nammineq isumagisarpakka, kueraqqissimagaangatalu kingumut isumageqqittarpakka, Beate Petersen Greve oqaluttuarpoq.

Kullorsuarmi innuttaasut 437-upput.

Allattoq: Káte Hansen, khan@avannaata.gl
Asseq: Beate P. Greve