Atuartut angerlarsimaffiat atuartunit Ilulissat nunaqarfiineersunit 16-init; Ilimanameersunit, Oqaatsuneersunit, Qeqertameersunit aamma Saqqameersunit najugaqarfigineqarnissaminut ulluni qaninnerni piariissaaq.
- Atuartunut angerlarsimaffik atuartumik innarluutilimmik innorluutilimmilluunniit najugaqarfigineqarsinnaasutut tulluarsagaavoq, issiavinnullu kaassuartakkanut iserfigineqarsinnaalluni aqquteqarpoq. Illu pingasoqiusanngorlugu agguagaavoq, ikuallattoqalissagaluarpat inneq pujorlu siaruaatinnginniassammata. Taamatuttaaq sillimaniarneq pillugu init tamarmik taamatut sanaajupput, Nivi Amossen, atuartunut angerlarsimaffittaami aqutsisoq oqarpoq.
Sulisut aqqaneq-marluk
Atuartut angerlarsimaffiat atuarnerup aallartinnerani atulersimasussaagaluarpoq, sanaartorneqarnerali kinguaattoorfiummat oktobarip 25-ani atoqqaarfissiorneqassaaq.
Atuartut angerlarsimaffianni aqqaneq-malunnik sulisoqassaaq; igasut marluk, eqqiaasoq ataaseq aammalu inulerisut arfineq-marluk.
- Atuartut atuartut angerlarsimaffianni najugaqartussat tikerarnissaannut suleqatigiiulluta tamatta qilanaarpugut, tassami atuartut aasaanerani atuanngiffeqareernerup kingorna atuarnerup aallartinnginnerani tikissimanissaat pilersaarutaagaluarmat. Atuartut atuartut angerlarsimafianni najugaqartussat oktobarip 14-aniit 16-iata tungaanut tikerarnissaat maanna pilersaarutaavoq, tassungalu qilanaarpugut, Nivi Amossen oqarpoq.
Kalaallit Nunaanni ukiuni qulini atuartinneqartussaatitaaneq atuuppoq, nunaqarfinnili atuarfinni 8. klasse ilanngullugu taamaallaat atuartoqarsinnaammat atuartut illoqarfimmut qaninnermut nuullutik atuarnertik nangissinnaasarpaat.
- Tassunga tunngatillugu atuartut tamarmik meeqqat atuarfianni naammassinninnissamik neqeroorfigineqartarput. Atuartullu illoqarfimmi atuarsinnaassappata atuartut angerlarsimaffiannik pilersitsisoqartariaqarpoq. Atuartut 9. klassemeersut atuartut angerlarsimaffianni najugaqarsinnaalersarput, angajoqqaalli 8. klassertussaatillit meeqqamik atuartut angerlarsimaffianni najugaqarnissaannut imikkut qinnuteqarsinnaapput, Nivi Amossen nassuiaavoq.
Atuartut angerlarsimaffiat atuartunut 21-nut inissaqartitsivoq.
Allattoq assiliisorlu: Káte Hansen, khan@avannaata.gl
Atuartut angerlarsimaffiat issiavinnik kaassuartakkanik atuisunit iserfigineqarsinnaasunngorlugu ikaartarfiligaavoq.
Uffarfik perusuersarfiutigisoq atuartumut innarluutilimmut naatsorsuussaq.
Ineeraq inissaqarluartoq atuartumut innarluutilimmut naatsorsussaq. Inimut atasumik uffarfeqarlunilu perusuersartarfeqarlunilu atisaasiveqarpoq.
Atuartut marlukkaarlutik immikkut uffarfilinni perusuersartarfilinnilu ineqatigiiaassapput.
Nerisarfik atuartunut naatsorsuussanik nillataartitsiveqarlunilu qerititsivilik, microovnilik aammalu isumaminik erruisarfilik. Atuartut angerlarsimaffimmi suliassat assinginik ulluinnarni suliakkinneqartassapput, soorlu erruivimmik imaarsillutik, allarterillutik, støvsugerlutik allallu.
Isersimaartarfimmut itsuarluni.
Igaffik nutaalianik atortorissaarutilik.
Init atorneqalinnginnerini eqqiaasut eqqiaallutik inaarsaapput.
Sikkilerpassuarnut sikkiliisivik.