Avannaata Kommuniani atuarfinni alloriarfinni misilitsinnermi inernerit qaffariartut

7. klassemi atuartitsissutini kalaallisut, qallunaatut, matematikimi kiisalu tuluttut misilitsinnermi angusat qaffariarput, 3. klassemilu qallunaatut misilitsinneq minillugu angusat aamma qaffariarput. Angusat Inerisaanermut Ataatsimiititaliami nuannaarutigineqarput.

- Angusat ilaat allaniit annertunerusumik malunnaatilimmillu qaffariarsimasut maluginiarparput, soorlu assersuutigalugu matematikkimi. Qaffariaateqarsimanernut suut tunngaviunersut paaserusullugu oqariartuuteqarpugut, akissutisinissarpullu qilanaaraarput, Lena Ravn Davidsen Inerisaanermut Ataatsimiititaliami siulittaasuusoq oqarpoq.

7. klassemi atuartitsissutit matematik aamma tuluttoorneq misilitsinnermi agguaqatigiissillugu inernerusuni qaffariarfiunerpaapput, tamatumani matematikkimi misilitsinnermi inerniliillaqqissuseq 2020-mi 34 %-iusimariarluni 2021-mi 41 %-imut qaffariarsimavoq. Tuluttoornermi inerniliillaqqissuseq 2020-mi 55 %-iniit 2021-mi 69 %-inut qaffariarsimavoq.

Tuluttut piginnaasat pitsanngoriartut
3. klassemi alloriarnermi misilitsinnerit atuartut nukarlerniit akullernut ikaarsaarnialeraangata - 4. klassemiit 7. klassemut – pisarput, 7. klassemilu alloriarnermi misilitsinnerit atuartut angajullerni atuartussanngoraata - 8. klassemiit 10. klassemut - pisarpoq.

3. klasseimi misilitsinnermi inernerusuni pitsanngoriaatit atuartitsissutini kalaallisoornermi aamma matematikkernermi ersarinnerpaapput, matematikkimi inerniliillaqqissuseq 2020-mi 46 %-imeeriarluni 2021-mi 53 %-inut qaffariarsimavoq.

3. klassemi kalaallisut misilitsinnermi inernerusut ukiuni kingullerni appariartuinnarlutik inerniliillaqqissuseq 2018-imi 56 %-imeeriarluni 2020-mi 41 %-inik angusaqarfiusimasoq 2021-mi 54 %-inut qaffariarsimavoq.

3. klassimi qallunaatoornermi misilitsinnermi inernerusuni inerniliillaqqissuseq 2018-imi 53 %-ioriarluni 2020-mi 47 %-inut appariarsimasoq 2021-mi 42 %-inut appariaqqippoq.

- Nukarlerni meeqqat tuluttut pikkorissigaluttuinnarnerat qallunaatut appariarnerannut pissutaasut ilagilluinnaraat qularinngilarput.

- Ullutsinni atortorissaarutit iPaditut ittut paasissutissanik avammut aallerfittut atorneqarneri tuluttullu paasissutissarpassuaqartut tuluttut misilitsinnermi inernerusunut iluaqutaasimassasut qularinngilarput. Aammali ulluinnarni meeqqaat spil-it aqqutigalugit tuluttut oqaatsinik piginnaasaqaraluttuinnarnerat ilisimaneqareersoq qaffassaaqataasimassaaq, Lena Ravn Davidsen oqarpoq nangillunilu:

- Ilinniartitsisut pisortaallu pitsaasumik suliaqarsimaneri pillugit qujaniarfigineqassasut aammalu angajoqqaat atuartullu misilitsinnermi inernerusunik ilisimatinneqarnissaat ataatsimiititaliamit piumasarinikuuarput.

Misilitsinnermi angusat uani alakkakkit.

Allattoq assiliisorlu: Káte Hansen, khan@avannaata.gl