Isumaginninnermut siunnersortit danskiusut Avannaata Kommunianit aallareernerisa kingorna ukioq suliluunniit qiteqqutinngilaq, suleqatigisimaneranniillu ersarissunik maanna angusaqarsimalereernerput naammagisimaarparput: Atuartut atugarliortut suliniuteqarfigineqarnerat maanna atuartitsinermi malinnaallualernerannik kinguneqareerpoq, illoqarfinni tamani nunaqarfinnilu pisariaqartitsinerpaani ilaqutariit ikinngitsut ilaqutariit katsorsarneqarnissaannut innersuunneqarsimalereerput, meeqqat inuusuttullu 18-inik ukioqalernissaasa tungaannut ornittagassaat Ilulissani misiligutaasumik suliniutitut aallartinneqarsimalereerpoq, taamalu pingaartumik akissarsiffiup nalaani toqqissisimanartumik avatangiiseqarnissaannut periarfissiisoqarluni, ilaqutariinnut katsorsaasut ilaqutariit illuiniittut piginnaanngorsarlugillu ilinniartinneqarsimalereerlutik ilaqutariit meerartallit pitsaanerusumik sullinneqarnissaat qulakkeerneqarpoq kiisalu isumaginninnermi sullissisugut angalasartut illoqarfinni malitsigisaanik suliarinikkiartorlutik maanna isumaginnissinnaanngoreerput.
Kalaallit Nunaanni Danmarkimilu assigiinngitsunik suliallit suleqatigiinnerisigut angusat qulaani taakkartukkat iluatsittut ilaminiinnaraat, tamatumanilu Kalaallit Nunaanni meeqqat inuusuttullu ilungersunartorsiortut pitsaanerusumik atugaqalernissaat peqqinnartumillu ineriartornissaat anguniarlugu suleqatigiit suliniutissanik 16-inik inassuteqarsimapput.
Taamaammat 80 millioner koruunit Martha Lund Olsenip meeqqanut atugarliornerpaanut atorneqarsimannginneragai aammalu Danmarkimi Isumaginninnermut Aqutsisoqarfiup annertusarneqarneranut atorneqarsimaneragai uagut kommunitsinnilu meeqqat inuusuttullu iluaqutigaagut. Martha Lund Olsen ilaatigut isumaqatigalugu Isumaginninnermut Aqutsisoqarfiup annertusarneqarneranut aningaasaliissutinik atuineq apeqquserusussinnaavara, aningaasammi sulisutta piginnaanngorsaarnissaannut atorneqarnissaat orniginarnerugaluarmat.
Angusagut iluatsissimasagut siunertalimmik anguniagaqarluni suleqatigiinnikkut, sulisutta issiaqatigineqarlutik isumaginninnikkut misissuinermi suliaqarnikkut piginnaanngorsarneqarnerisigut aammalu Meeqqat tapersersorneqarnissaannut Inatsisartut inatsisaat nr. 20, 26. juni 2017-imeersumi § 14-imi immikkoortut tamaasa malillugit kingornalu suliniutissanik pilersaarusiornermut ilinniartitsinikkut anguagut.
Pingaarnertut oqaatigalugu assigiinngitsunik suliallit suleqatigiinnerisigut suliassanik isumaginnittarneq pisariillisarneqarlunilu sukkanerulersinneqarpoq. Suliassanik isumaginnittartut sullissisussatut suliassallu aallaavigalugit akimmisaarfiunnginnerusumik sulisinnaalernermikkut suliassanik isumaginnittarnermi pilertornerusumik pitsaanerusumillu inaarsisinnaalerput.
Tamatuma saniatigut atuarfinnik, meeraaqqerivinnik aammalu meeqqerivinnik suleqateqarnitta killilerneratigut suliffeqarfiit taakku meeqqanik atugarliortunik sullissinerminni nalilersuisinnaanikkut sullissisinnaanikkullu kiffaanngissuseqarnerulersinneqarput.
Eqqaariikkattuut isumaginninnermi siunnersortit qallunaajusut tikinngikkallarmatali kommunitsinnilu sulineranni suleqateqarneq pissarsiffiulluaqaaq, neriuutigaarpullu aammaloorlutik maanga suliartortinneqaqqinniarumaartut.
Meeqqanut inuusuttunullu suliniuteqarnerup nakussassarneqarnissaa, taamalu toqqissisimanartumik, asanninneqartumik patajaatsumillu tunngavissinneqarnermikkut sapinngisamik peqqinnartumik inersimasunngornissaat kalaallit danskillu assigiinngitsunik suliallit akornanni suleqatigiinneranni anguniagaavoq. Avannaata Kommuniani angusaqarlualereerpugut aammalu meeqqanut inuusuttunullu sullissinermi suliniutinik malunnaatilinnik amerlanerusunik allartitsinissarput pitsaasunillu angusaqarnissarput qilanaaraarput.
Palle Jerimiassen
Avannaata Kommuniani borgmesteri