Meeqqanut ulluunerani paaqqinnittarfik akuleriinnik ukiulinnut naatsorsuussaq meeqqanut 44-nut inissaqartitsisoq Uummannami ippassaq novembarip aallaqqaataani atorneqalerpoq.
- Ulluunerani paaqqinnittarfik meeraaqqerivittaani 24-nut meeqqerivittaanilu 20-nut inissaqartitsivoq. Meeqqat ininut pingasunut assigiimmik pisatsersorneqarsimasunut aammalu meeqqat ukiui aallaavigalugit atorneqarsinnaasunut agguagaapput, Else Marie Ravnshøj Johansen Avannaata Kommuniani ulluunerani paaqqinnittarfinnut ingerlatsisuusoq oqarpoq.
Meeqqerivimmiilernissamut utaqqisut qulit
Else Marie Ravnshøj Johansen aamma ilisimatitsivoq, Uummannami najukkami ataatsimiititaliami ilaasortat meeqqeriviup sumiinnissaanik isikkussaanillu aalajangeeqaataasimasut aammalu pisattanik pisiniarnermi akuerseqataasimasut.
- Uummannaq ataatsimik meeqqeriveqareerpoq, meeqqerivittaallu atuutilersinneqarneratigut meeqqat meeqqerivimmut inissinneqarnissaminnut utaqqisut qulit missaanniilerput, Anna Qvist Siegstad, meeqqerivittaami ingerlatsisoq oqarpoq.
Ulluunerani paaqqinnittarfik 630 kvadratmeterinik angissuseqartoq meeqqanut mikinernut anginernullu naatsorsuussanik marlunnik immikkoortunik pinnguartarfeqarpoq.
Paaqqinnittarfik 13-inik sulisoqarpoq; aqutsisoq ataaseq, inini sulisut qulingiluat, iggavimmiut marluk aammalu eqqiaasoq ataaseq.
Paaqqinnittarfimmik pisortatigoortumik ammaanersiornissaq ilaatigut atsiinertaqarumaartoq Avannaata Kommuniata nittartagaatigut kingusinnerusukkut nalunaarutigineqarumaarpoq.
Ulluunerani paaqqinnittarfimmit assilisat ataani takukkit.
Assit: Anna Qvist Siegstad
