Entreprenørmaskiner tonsinik 25-nik oqimaatsigisut ujaraaqqanik skærvenillu toqqippallaanngikkaluartoq aqqutigisarlugu assartuipput. Taakkua maskiinat arlaleriarlutik ingerlasinnaajunnaartarput, uteqattaarneranilu aqqusinniaq piariigaq kiviartuinnaavilluni. Suliaq taanna nuna qereriarpat ajornannginnerungaatsiartumik suliarineqarsinnaavoq.
- Maskiinat angisuut aqqusinikkut ujaqqanik assartuisut saniatigut qamuteralaat qimussillu ingerlaartalernikuupput. Qamuteralaat larvefodii qimussillu kingaallattaatai gumminik sanaat aqqusinermiit kaavillutik ujaqqat teqqalatittarpaat taamaasillutik aqqusinniorneq suli aamma ajornarlisarlugu. Taamaattumik innuttaasut kaammatorpavut aqqusinikkut ingerlasaqqunagit. Aqqusernip suliarineqarnerata nalaani utaqqisinnaasariaqarput, teknikkeqarfiup nalunaarutigivaa:
- Ilanngullugu ukiut ingerlaneranni aqqusineq masarsummut kiviartornerani ataavartumik ujaraaqqanik pilersortariaqartassaaq. Aqqusineq qaqqamut tunngassangaluarpat, aqqusinniornermut missingersuut allaassangaluarpoq, taamaattumik una iluarsiissut akikinnerujussuaq toqqarneqarpoq.
Aqqusinermik sanaartornissaq kommunalbestyrelsep november 2019-imi aalajangerpaa, innuttaasut qimmillit qimmiminnik nerisitsiniarlutik aqqutaat aqqutigineqarsinnaasoq pittaangorsarniarlugu. Aqqut taamaattumik qimmit nerisassaannut imigassaisalu qimmilivinnut assartornerannut aqqutissiaavoq.
Aqqut kilumiiterimik ataatsimik takissuseqassaaq, entreprenørillu inaarnissaanut 100 miiterit sinneruttut amigaatigivaat aammalu aqqusernup manissarnissaa amigaataalluni, taamaasiguni aqqutigineqarsinnaalissaaq. Aqqusineq ilimagineqarpoq ukiup naanerani piareerneqassasoq.
Allattoq: Teknikkeqarnermut Ingerlatsivik
Kalaallisut: Nutserisut