Upernavimmi inuit 1000-it sinnerlugit coronamut misissortissimalereerput. Kisianni Upernavimmi peqqinnissaqarfimmi nukissat killeqarput, tamannalu ima isumaqarpoq suliniutit ilaasa llanngortinneqarnerinik.
Kaammaattuutigaarput Upernavimmi inuttaasut tamarmik angerlarsimaannarnissaat.
Sammisaqartitsinerit orpiup ikinnerani unitsinneqarput
Avannaata kommuniani tamani orpiit ikinneqarnissapput. Kisianni innuttaasunut sammisaqartitsinerit aaqqissuussinerat unitsinneqarpoq.
Innuttaasut tamaasa kaammattussavagut eqimattanngorlutik ataatsimuunnginnissaanik, aamma juullikkunni. Naak amerlasuut juullimut qilanaaraluartut eqqaamasariaqarparput immitsinnut innuttaaqatigullu paareqatigiissagatta. Suliniutinut nutaanut tunngatillugu allannguisoqartillugu Avannaata kommunianit tamanna nalunaarutigineqartassasoq ilisimatitsissutigineqassaaq.
Tamatuma saniatigut innuttaasut tamaasa kaammattussavakka innersuussutit uku malinneqarnissaannik:
• Napparsimaguit angerlarsimagit
• Assatit asakulakkit imaluunniit spriti assannoortoq atoruk
• Talivit peqittarfianut quersorlutilluunniit tangajorit
• Timikkut attuinaveersaarit – assamminnaveersaarit, ersakkut kunissinaveersaarit, pakkutaarinaveersaarit il.il.
• Eqqiaakulagit inillu silaannarissakulakkit – angerlarsimaffinni suliffinnilu
• Inunnut allanut qanillinaveersaarit allallu taamaaliornissaannik piumaffigikkit.
Tuniluunnissaq pinaveersaarniarlugu Nakorsaaneqarfimmit innersuussutit arfinillit malinnissaat iliuuserisassat pitsaanersaraat. Angerlarsimaffinni, kikkut tamat ornittagaanni, atuarfimmi aamma suliffeqarfimmi ulluinnarni ileqquliutissagitit innersuussutigaarput. Meeqqat innersuussutinik malinninnissaannut ikiortarnissaat aamma eqqaamajuk.
Palle Jerimiassen
Avannaata Kommuniani borgmesteri