Upernavimmi meeqqanut ornittakkat ilaneqalersut

Meeqqat inuusuttullu ornittagariligassaat Upernavimmi ilaqutariit illuanni inissisimasussaq aappaagumiit periarfissaalissaaq.

- Illoqarfimmi meeqqanut inuusuttunullu sammisassassaqartitsinerit ilaneqarnissaannik periarfissiiniarpugut aammalu pisariaqartitsisut inersimasumik oqaloqateqarsinnaanissaannut periarfissiiniarluta. Inunnik isumaginnittumik sulisumillu atorfinitsitsiniassagatta suliffinnut inuttassarsiuussinissat piareersaleruttorpagut, Karen Lund Fleischer Ilaqutareeqarnermut Ingerlatsivimmi ingerlatsisoq oqarpoq.

Ilulissani ornittakkami meeqqat pisariaqartitsisinnaasut pinaveersaarfigineqarnissaat siunertaralugu oqaloqatiginninnissamik periarfissaqartinneqarnerat Ilaqutareeqarnermut Ingerlatsivimmit isumassarsiorfigineqarsimavoq.

- Upernavimmi meeqqat ilaannut pinaveersaartitsinissaq pisariaqartinneqartoq ilisimaaraarput, ilaqutariillu illuanni ininik siunertamut atorneqarsinnaasunik periarfissaqarmat ornittagaq aappaagumiit neqeroorutaasinnaalissaaq, Karen Lund Fleischer oqarpoq.

Upernavimmi atuareernerup kingorna marlunnik ornittagaqareerpoq. Meeqqat 1. klassemiit 3. klasse ilanngullugu atuartut Qaamaliami paarineqarnissamik periarfissaqarput aammalu 4. klassemiit 7. klasse ilanngullugu atuartut Klub Nordstjerne-mi sammisassaqartinneqartarlutik. Atuareernerup kingorna ornittakkat tamarmik ullup qeqqaniit ualikkut tallimat tungaannut ammasarput.

Meeqqat 4. klasseniit apersortittussanngortut ilanngullugit ornittakkami Qaamaliaq-mi unnukkut sammisassaqartinneqartarput aammalu inuusuttut apersortittussanngortuniit 21-nik ukiullit Nordstjerne-mi unnukkut arfineq-marlunniit qulit tungaannut sammisassaqartinneqartarput.

Allattoq: Káte Hansen, khan@avannaata.gl