Lars Erik Reimerip 2021-mi Timersullammattut toqqarneqarnerani pilluaqqullugu borgmester Palle Jerimiassen kommunalbestyrelse sinnerlugu oqaaseqartuuvoq.
- Timersullammattut toqqagaanissami piumasaqaatit tamaasa naammassivatit. Ilaatigut nunarput sinnerlugu isikkamik aammalu futsalimi arsaattartutut piumassusermik annertuumik takutitsisarnikkut pitsaasunik angusaqarluarnikkut maligassiuivutit. Taamaammat 2021-mi Timersullammattut toqqarneqarputit, Palle Jerimiassen oqalugiarluni ilaatigut oqarpoq.
2021-mi Timersullammammik toqqaaneq Ilulissani kommunip allaffeqarfissuani ippassaq decembarip 29-ani nal. 14.00 ilasseqatigiinnermi aammali corona pissutigalugu killilersuisoqarmat ilaqutaasut qaasarneqarsimasullu ikittuinnaat peqataaffigisaanni ingerlanneqarpoq.
2021-mi Timersullammattut toqqarneqartoq suli Nagdlúnguak’-mi sungiusaasuminit akisussaaffilersorneqarluni sungiusartartuusoq najuuttunit arlalinnit nersorniarneqarpoq.
- Marluliaqatillu Nicki ukiut ingerlaneranni annertuumik sungiusartarnissigut kusanartunik angusaqartarnissigut pitsaasunik sunniuteqartarnisi tulluusimaarutigalugit Nagdlúnguak’-miit malinnaavigisimavagut. Taamaammallu Timersullammattut innersuussinerput pissusissamisuuginnarpoq, Nagdlúnguak’-mi siulittaasoq Lena Ravn Davidsen ilaatigut oqarpoq.
Avannaata Kommuniani Timersullammattut kina toqqarneqassanersoq ataatsimiititaliamit illoqarfinnit sisamanit Peqqik Sunngiffimmi immikkoortortanit sinniisuutitaqartumit borgmesterimiillu peqataaffigineqartumik aalajangiiffigineqartarpoq.
Lars Erik Reimer Timersullammattut toqqarneqarnermini aamma 5.000 koruuninik tunissuteqarfigineqarpoq.
Timersullammammik toqqaasoqarnerani assit ataaniittut takukkit.
Allattoq assiliisorlu: Káte Hansen, khan@avannaata.gl
