-Pissutsit akuerineqarsinnanngillat, Avannaata Kommuniani illoqarfiit arlallit umiarsuaq ataaseq kisiat isumalluutigissappagu. Innuttaasorpassuit nerisassanut aalajangersimasunut sapingaqartarput, pisiniarfinnilu ilisivinni nerisassat immikkut ittut pisiassaralui imaqanngillat. Meeraaqqanut immuit, naatsiiat manniillu nungullutik pisiarineqarsinnaanngitsut taaginnarsinnaavavut, Avannaata Kommuniani borgmester Palle Jerimiassen (AT) oqarpoq.
-Royal Arctic Line piareersimanerusariaqarpoq. Tamanna suaartaatigisariaqarparput maani Avannaani illoqarfinnut arlalinnut assut ajornartorsiutaammat, nioqqutissanik pineq ajornerput pillugu, Palle Jerimiassen oqaluttuarpoq.
Ilulissat tassaavoq illoqarfik takornariaqarfik angisooq, taakkulu ilanngullugit mittarfissaq eqqarsaatigigaanni, illoqarfik suli angininngussaaq. Taamaattumik siunissami suli ajornartorsiutaanerussaaq, inuit suli amerlanerusut pisiniarfimmi nerisassanik amingaateqalerunik.
-Sakkortunerpaamik Royal Arctic Line piumaffiginiarpara, illoqarfinnut avannaaniittunut nerisassanik tikittoqarnissaa pillugu periarfissat misissoqqullugit. Sikunut aserorterummut aningaasaliinissaq periarfissaasinnaavoq, imaanngilarmi Avannaata Kommuniani innuttaasut, pisiassat timmisartukkoortitat taama akisutigisunngorlugit pisiarisassanngaat. Akisoqaaq, aamma imaanngilaq inuit tamarmik naatitat grøntsagillu nutaat 150 koruunilerlugit pisiarinissaannut akissallit.
Royal Arctic Line siunissaq eqqarsaatigalugu iluarsiissummik ajornanngitsumik nassaartariaqarpoq, Palle Jerimiassen oqarpoq.
Ilulissani pisiniarfiit pisiassanik timmisartukkut qaammat kingulleq tikittoortarput kisiannili Dansk Metalip ilimasaarutaa, suliumajunnaarnissaq sulisitaqarumajunnaarnissarlu pisussanngoriasaarpat, nerisassanik timmisartumik umiarsuakkulluunniit tikittoqarsinnaajunnaassappat Avannaata Kommuiniani innuttaasut eqqugaassapput.
Nerisassanik pajuttoq Mary Arctica kingullermi Ilulissaniippoq 15.januar 2022.