Piffik taanna taaneqartarpoq ”Kingarsima”, misissuinerillu tunngavigalugit GEUS naliliivoq piffimmi tassanngaanniit, qaqqap sisoorsinnaanera ilimanartorujussuusoq, tamannalu nunaqarfinnut Niaqornanut, Qaarsunnut Ukkusissanullu sakkortuumik kinguneqarsinnaasoq.
Pisoq kiisalu ilisimatitsissutit ”Kingarsima” nutaajungaatsiarput aamma Avannaata Kommuniata pisoq sakkortuumik isigaa. Taamaattumik upalungaarsimanermut tunngasunik arlalinnik aallartitsisoqareerpoq. Tassaarsuaqalissappat ilaatigut nunaqarfinnut tamanut inuit sumut qimaanissaannut allagartanik ikkussuisoqareerluni aamma nunaqarfinnut tamanut inuit ataatsimoorfissaannut allagartalersuisoqareeluni. Kiisalu Avannaata Kommuniata nunaqarfinni tamani nakkutilliisoqarnissaanut qulakkeerinninnissaq ingerlatiinnassavaa.
Avannaata Kommunia upalungaarsuineq immikkut eqqumaffigaa aamma kommuni pisortaqarfik, politiit, peqqinnissaqarfik kiisalu qatserisartut qanimut suleqatigai. Qanimut suleqatigiittoqarpoq, tassani Karrat qangerluani ingerlaannartumik killiffik pillugu nalunaaruteqartarnikkut kiisalu upalungaarsimanissamut pilersaarummik sanasoqarluni. Upalungaarsuisut qanimut suleqatiginerani, Avannaata Kommuniata takussutissaqartippaa siunissami tassaarsuaqarsinnaanera piareersimaffigineqartoq.
”Immikkut eqqumaffiginiarparput paasissutissat nutaat Uummannami Uumannallu eqqaani innuttaasunut qisuariartitsisinnaanerat. Siornatigut ajunaarnersuaqartillugu misigisaqareersimapput ajunaarnersuaqaqqilernissaanullu taama erloqinartigisumik eqqaasinneqarneq ajorluinnarpoq. Soorunalimi kissaatigaarput innuttaasut toqqisisimanissaat taamaattumillu tarnip pissusaanik immikkut ilisimasalimmik ikiorneqarnissaq periarfississuarput, tassaarsuaqarsinnaaneranut tunngatillugu oqaloqatiginninnissamik pisariaqartitsisunut”, Avannaata Kommuniani borgmesteri, Palle Jerimiassen oqarpoq.
Namminersorlutik Oqartussat siunnersuinermi kiisalu tarnip pissusaanik immikkut ilisimasallip ikiuinissaanik akisussaasuuvoq. Tassani toqqaannartumik oqarasuaatikkut sianersinnaaneq pissaaq, toqqissisimanngikkuit imaluunniit tarnip pissusaanik immikkut ilisimasalimmik oqaloqateqarusukkuit sianersinnaavutit.
Ernumaguit imaluunniit oqaloqatiginninnissamik pisariaqartitsiguit, Tusaannga 80 11 80 sianersinnaavutit imaluunniit sms-imik allallutik 1899-imut.
Tusaannga-p ammasarfii imaapput:
Ataasinngorneq –sisamanngorneq nal. 9.00-22.00
Tallimanngorneq nal. 9.00-04.00
Arfininngorneq nal. 16.00-04.00
Sapaat nal. 16.00-22.00