Ataatsimiinnermi takornarialerisunit isummersortinneqarnissaq pingaarnerusumik siunertaavoq, takornariat amerliartornerannut atatillugu unammilligassat qanoq ittut siunissami naammattoorneqarsinnaanersut pineqarlutik. Takornarialerisutut unammilligassat, aammali takornariat amerleriartornerisa kinguneratut assersuutigalugu aalisarnermik inuussutissarsiuteqarnermut aamma sumiiffimmi inuiaqatigiinnut unammilligassat qanoq ittut sunniutaassanersut eqqartorneqarput.
Kommunip, takornarialerinermik suliaqartut peqatigalugit, ataatsimoorlutik isumaqatigiilernissaat, takornariaqarnermullu periusissiamut inatsisissamullu suliarineqartussanut piumasaqaatinik, kissaatinik aamma isumassarsianik, Nunanut Allanut, Inuussutissarsiornermut Niuernermullu Naalakkersuisup, Vivian Motzfeldtip Ilulissanut ulloq 9. septemberimi tikeraarluni tikinnginnerani siunnersuuteqarnissaat anguniarneqarpoq.
Assigiinngitsorpassuit eqqartorneqarput, aamma isummat assigiinngitsut oqaluuserineqarlutik.
UNESCO – attassiinnarusuttut akerliusullu
Ilulissat Kangiata UNESCO-mi nunarsuarmi kingornussassatut ilaanera pillugu killiffik. Politikerit aamma takornarialerisut ataasiakkaat UNESCO-mi nunarsuarmi kingornussassatut inissisimaneq sumiiffimmut qanorlu atorneqarsinnaaneranut amerlavallaanik killiliisarsimasoq siusinnerusukkut isumaqarfigisarsimavaat, allalli UNESCO-mi nunarsuarmi kingornussassatut inissisimaneq immini takornariarpassuarnik kajungerisitsisartoq isumaqarlutik. Eqqissisimatitsineq atorunnaarsinneqarpat asseqanngitsut piuneerutsinneqarnissaannut ulorianaateqartoq ernummatigaat. Aamma UNESCO-mi nunarsuarmi kingornussassat ilaattut inissisimanera allanngortinneqassagaluarpat Ilulissat Kangiata eqqaani sumiiffiup allaanerusumik atorneqartalernissaanut sunniuteqassanersoq ilisimaneqanngilaq, tassami sumiiffik aamma nunami eqqissisimatitaareermat.
Umiarsuarnik angalaarluni takornariaqarnerup atassuteqaatersuutit unammillerpai
Umiarsuarnik angalaarluni takornariaqarneq aamma annertuumik eqqartorneqarpoq. Tusagassiuutini tamanna eqqartorneqaqattaareerpoq, aamma sumiiffimmi takornarialerisut aalisartullu eqqarsaataanni initulluni. Unammilligassat annersaata ilagaat kommunip atassuteqaatersuutaasa, umiarsuarnik angalaarlutik takornariat taama amerlatigisut ullut ilaanni tikittartussanut piareersimannginnerat.
Umiarsuit Ilulissani kisaqqasarnerat pillugu naammagittaalliortoqarpoq, kisaqqatillutik namminneq suli sarfaliortarmata, tamatumalu kingunerisaanik nipiliorlutillu mingutsitsisarlutik. Akerlianik illoqarfiup innaallagissiorfianut attavilerneqartarnissaat kissaatigineqarpoq, tassunga erngup nukinga atorlugu innaallagissiortoqartarpoq. Avannaata Kommuniani, aamma nalinginnaasumik Kalaallit Nunaanni, piujartitsinerunissap kissaatigineqarnera assut qitiutinneqarpoq. Takornariaqarneq annertusiartuinnassappat, taava piujuartitsilluni pinissaa aamma tunngaviusariaqarpoq.
Arlaannaataluunniit kommunimi takornariaqarnerup annertusiartornerata killilersimaartinnissaa kissaatiginngilaa, kisianni isumaqatigiissutigineqarpoq annertusiartorneq pitsaanerusumik aqussinnaasariaqartoq. Takornarialerisut ilaatigut kissaatigaat pisortat atassuteqaatersuutaat amerlisarneqartariaqartut. Aqqusernit, pisuinnaat aqqutaasa, aqqusineeqqat aamma anartarfiit kikkulluunniit atorsinnaasaasa amerlinissaat kissaatigineqarpoq.
Ukioq kaajallallugu takornariaqarneq
Takornarialerisut hotelillu ukioq kaajallallugu takornariaqalernissaanik assut kissaateqarnertik oqaatigaat. Takornariaqarnerpaaffimmi hotelit tamarmik ulikkaaqqasarput, kisianni ukiup sinnerani assut inissaqartarlutik. Oqallisigineqarpoq ukiukkut takornariartitsineq qanoq pitsaanerusumik tuniniarneqarsinnaanersoq, taamaalilluni ikinnerusunik takornariarfiusarnerup nalaani amerlanerusut takornariarsinnaalersillugit, taamaalillunilu isertitat annertunerulersillugit, aamma tamatumunnga peqatigitillugu takornarissat ukioq tamaat pitsaanerusumik siaruaassinnaalertillugit.
Takornariaqarneq eqqartortillugu soorunani aningaasaqarneq aamma eqqartussallugu pingaaruteqarpoq. Takornarialerisunut aningaasaliinissaq akilersinnaasariaqarpoq, aamma takornariarpassuit tikittalernerat aamma pinngortitatsinnik najugaqarfitsinnillu iluarisimaarinninnerat kommunimi innuttaasunut pitsaasumik niuerfiusinnaasariaqarluni. Siusinnerusukkut eqqartorneqartarsimavoq qanoq ililluni umiarsuit takornariartaatit sumiiffimmi aningaasaqarnermut naammattumik aningaasarsiutaasinnaanersut, aamma aaqqissutaasinnaasut allat assigiinngitsut ataatsimiinermi oqallisigineqarput. Takornarissanik takornariarnissamut anusinngortitsisumik periuseqartoqarnissaq kissaatigineqanngilaq, imaluunniit sumiiffimmi innuttaasut sumiiffimmi kajungernartumi najugaqarsinnaanissaasa akisuujunissaa kissaatigineqaranittaaq.
Takornarianik angallassisartut akuersissuteqartarnissaat
Sumiiffimmi takornarialerisut ilaasa, takornarissat ilaasa takornarianillu angallassisartut ilaasa kommunimut tikeraaraangamik pissusilersuutigisartagaat ernumassutigaat. Tikeraat ilaat ilulissani qallortut, iluliarsuit angisuut akornatigoorlutik ingerlaartut, arferit qanippallaarlugit ingerlasut, qimussit illernini pisuttut imaluunniit assigisaannik naleqqutinngitsumik pissusilersortut assersuutigineqarput. Taamaattumik Kalaallit Nunaannut takornariarnermi qanoq pissusilersortarnissaq pillugu ataatsimoorussanik malittarisassaliortoqarnissaa kissaatigineqarpoq. Takornarianik angallassisartut takornarialerisullu arlaatigut akuersissuteqartarnissaat siunnersuutigineqarpoq, taamaalilluni takornarissat ilitsersornissaannut pisariaqartinneqartumik ilisimasaqarnissaq qulakkeerneqassammat. Takornarianik angallassisartoqanngikkaanni, imaluunniit sumiiffimmik issittumilu pissutsinik ilisimasaqanngitsumik takornarianut angallassisartoqaraanni, taava imminut takornarissanilluunniit angallatanik ulorianartorsiortitsisoqarsinnaavoq, aamma assersuutigalugu aalisarnermik inuuniuteqartunut ajoqusersuisoqarsinnaalluni.
Oqallinnermut tassunga malitseqartitsinertut, aamma upalungaarsimanissaq apeqqutigineqarpoq. Takornarialerisut ilaasa, upalungaarsimaneq umiarsuit timmisartullu annerit amerlanerillu ukiuni tulliuttuni tikittalerpata ajunaarnernut annertuunut pisinnaasunut piareersimanersoq apeqqutigaat. Kommunimi upalungaarsimanissamik pilersaaruteqarpoq, aamma nuna tamakkerlugu upalungaarsimanissamik pilersaaruteqartoqarluni, taakku ingerlaavartumik nutarterneqartarniarput.
Takornariaqarneq aalisarnermik sunniivigeqateqartoq
Takornariaqarneq ukiuni kingullerni assut annertusisimaqaaq, tamannalu ilaatigut aalisarnermut unammillertaalersimavoq. Umiarsuarnik angalaarluni takornariartaassuit angisuut ilaanni aalisartut qassutaannik ningittagaannillu ingerlaartillutik kalluaasarput, aalisartullu taamaalillutik pisatik annaasarpaat.
Aammattaaq umiatsianik takornariartitsisartut amerleriarsimapput, taamaalillutik aalisartut takornarialerisullu talittarfimmiinnissaat ajornarsisimalluni. Ajornartorsiut takornarialerisut ilaannik mittarfimmut qaninnerusumut Itisuarsummut nutsertitsinikkut aaqqiviginiarsarineqarpoq, kisianni industriip nioqqutissiorfiusup annertuup umiarsualivimmit allamut nuunneratigut aaqqiissutaasinnaasoq, mittarfittaassamut atatillugu umiarsualiviliassamut nutaamut nuutsitsinissaq eqqartorneqarluni.
Takornarialerinermi siunnersortit isummersuutit eqqartorneqartut amerlasuut allattorpaat, aamma ataatsimut kissaatigineqartut pillugit sulinertik ingerlateqqinniarlugu. Ataatsimiinneq tunngavigalugu takornarialerinermik suliaqartunut apersuinermi immersugassaq nassiunniarpaat.