Avannaata Kommuniani Kommunalbestyrelse november 2022 ataatsimiinnerminni aalajangiuppaat kommuni ESANI-mut ilaasortanngussanngitsoq. Kommunimi qinikkat soqutigineruaat sumiiffinnut naleqqussakkanik eqqaavilerineq isumagineqassasoq, pinngortitamik innarlitsaaliuineq annertusisillugu.
ESANI-p eqqakkanik isumaginneriaasia tassaavoq eqqakkat illoqarfinniit nunaqarfinniillu Nuummi Sisimiuniluunniit ikuallaavissuarnut imaatigut assartuunneqartarnissaat, taakkunani ikuallanneqassammata nukissiornermilu iluaqutigineqarlutik.
Piujuaannartitsinermik tunngavilimmik sumiiffinni eqqakkanik isumaginninneq
Avannaata Kommuniata kissaatigivaa piujuaannartitsinermik tunngaveqarluni sumiiffinni eqqakkanik isumaginninneriaatsit ineriartortinneqarnissaat.
”Illoqarfimmit avannarpasinnerpaamit kujasinnerpaamut sineriaqarpugut 1200 kilometerinik isorartutigisumik. Ukiup ilarujussuani illoqarfiit nunaqarfiillu ilarparujussuinit ESANI eqqakkanik imaatigut angallassisinnaanngilaq. Taamaattumik piffissami sivisuumi eqqakkanik uninngatitsisarneq ilaasortanngornerinnakkut aaqqinneqarnavianngilaq” Avannaata Kommuniani borgmesteri Palle Jeremiassen oqarpoq.
Avannaata Kommuniani qinikkat kissaatigaat kommunimi inoqarfinni ikuallaaveeqqanik pilersitsiortortoqassasoq.
”Kissaatigaarput eqqakkat immikkoortiterlugit iluaqutiginneqqiisinnaaneq ullumikkornit annertunerusoq ineriartortissallugu. Tamanna piffissamik pisariaqartitsivoq, aallartereerpugulli” Palle Jeremiassen erseqqissaavoq.
Borgmesterip tikkuarpaa kommunip pilersaarusiornermut pilersaarutaa 2020 piujuaannartitsinissamik tunngaveqarmat, 2022-imilu ukiap ingerlanerani Saqqamiit Qeqertamiillu parammit atorlugit eqqakkat tonserpassuit aallarunneqarsimasut. Taakkkunani eqqaaviit torersarneqarput saviminikorpassuit maskinakorpassuillu Ilulissanukaanneqarsimapput kingornatigullu Danmarkimut aallarunneqarlutik tuniniarneqarsimallutik.
”Torersaaneq Avannaata Kommuniani Avatangiisinut Sanaartornermullu immikkoortortaanit pilersaarusiorneqarluni suliffeqarfimmit KJ-mit isumagineqarpoq, ilaatigut Namminersorlutik Oqartussanit tapiiffigineqarluni. Tamatuma takutippaa atorsinnaasunik aaqqiisoqarsinnaasoq ullumikkumut sanilliullugu annertunerusumik atoqqiinermik tunngaveqartumik. Taamatut tunngaveqarluni aaqqiinerit amerlanerusut inerisartariaqarpagut” Palle Jeremiassen oqarpoq.
2023-imi aallartinneqassaaq suliniut annertoorujussuaq, tamatumani siunertarineqarluni eqqakkat pinngortitamut ulorianaateqarsinnaasut, soorlu elektronik-imeersut batterillu immikkoortiterneqartarnissaat, soorlu aamma igalaamernit angerlarsimaffinnilu atortorissaarutaasimasut saviminikut immikkoortiterneqartarneri kommunimi tamarmi ingerlalluarneqalereersimasoq.
”Aqqutissaq eqqortoq toqqarparput, tassalu atoqqiineq annertunerusoq, iluaqutignneqqiineq annerusoq ikuallaanerlu annikinnerusoq. Eqqakkanik ikuallaasarnerput najukkani ataasiakkaani pisassaaq, taamaalilluta aamma tamaani piujuaannartitsineq tunngavigalugu pinngortitamik mianerinninneq pissalluni,” borgmester Palle Jeremiassen oqarpoq.
Isumannaatsumik eqqakkanik uninngatitsineq
Siunissami aaqqissuussinissamut atatillugu 2022-imi Avannaata Kommunia eqqakkanik poortuummik maskinarsuarsisivoq. Taanna atorlugu immikkoortiterineq poortuinerlu pisinnaavoq, eqqakkallu sinnikui poortarsuanngorlugit 600-1000 kilo missaanniittunut immikkoortiterneqarsinnaallutik. Taamatut immikkoortitereriaatsimi poortueriaatsimilu tipimik, pinngortitamut seerisoqarsinnaaneranik allatulluunniit ajornartorsiutaasinnaasut pinngitsoortinneqarsinnaapput.
Eqqakkanik poortuinermi maskiinarsuaq taanna aallaqqaatigalugu Ilulissani eqqaavissuarmi torersaanermi atorneqarsimavoq, pilersaarutaavorlu maskinarsuup aappaa eqqakkanik eqiterisussaq Uummannami april 2023 atorneqalissasoq.
Avannaata Kommuniani nalilerneqarpoq immikkoortiterineq, atoqqiineq, poortuineq najukkanilu ataasiakkaani ikuallaaneq ukioq kaajallallugu ESANI-mut ilaasortanngornikkut aaqqiivigineqarnavianngitsoq.
”Taamaattumik politikkikkut aalajangersimavugut piujuaannartitsineq tunngavigalugu akisussaassuseqartumik aaqqiineq pitsaanerpaaq sumiiffitsinnullu naleqqunnerpaajusoq toqqassallutigu, taamaaliornitsigut kommunitsinni inoqarfinnut avannarpasinnerpaamiit kujasinnerpaamiittunut periaaseq tamanna iluaqutigineqarsinnaammat. Taamatullu aalajangernerput naapertuuppoq kommunip pilersaarutaanut 2020-meersumut, piujuaannartitsinermik avatangiisinillu mianerinninnissamik toqqammaveqartumut,” Palle Jeremiassen oqaluttuarpoq.
Eqqakkat isumagineqartarnerat pillugu Kommuni kikkunnilluunniit suleqateqarumavoq, tamatumani aamma ESANI eqqarsaatigalugu.