”Tupaallaatigisorujussuuara, meeqqat akornanni agiarnermik ilinniartitsineq, soqutigineqartorujussuummat. Meeqqat ilai nipilersornermut soqutiginnittorujussuupput, taamaalillutik imminnut tatigalutik nipilersuut atorsinnaallugu,” taama oqaluttuarpoq sunngiffimmi aqutsisoq, Birgitta Kammann Danielsen, Avannaata Kommunia, Kullorsuaq.
Nunaqarfik Kullorsuarmi 440-t missaani inoqartumi agiartartunik aallartitsinissamik upperinnittut ilagaat.
Agissamik ilinniartitsineq ukiarmi 2022 aallartinneqarpoq agissanik mikisunik tallimanik aallarniuteqarluni. Meeqqat 1 – 5 klassini atuartut ilinniartinneqarput – kiisalu atuartoq 8. klasse-meersoq ataaseq agiarneq ilinniarusuttoq.
”Tupaallaatigisorujussuuara meeqqat taama soqutiginnitsigimmata. Soorunami ilai ilaajunnaarnikuupput, kisianni amerlanerit soqutiginneqaat ilinniartinneqarnissaminnut qilanaartuaannarlutik”, Birgitta Kammann Danielsen oqaluttuarpoq.
Grønlands Strygerforening – Nunatta agiartartoqatigiivi – niik attavigineqarsimavoq Nunatsinni agiartarnerup inerisarnissaanut, pilersaarummullu aningaasateqarfinnut qinnuteqarsimalluni.
Meeqqat namminneq nipilersorneq aqqutigalugu takutitsisinnaapput
Ilinniartitsisoq, Katharina Qvist, Nuummi najugaqartoq Kullorsuarmut ukiarmi tikippoq. Naak Kullorsuarmi inissaaleqisoqaraluaqisoq sunngiffimmi aqutsisup Katharina Qvist inimik ataatsimik pissarsissussinnaasimavaa.
”Isumaqarpunga naleqquttoq,” Birgita Kammann Danielsen oqarpoq.
Agissamik ilinniartitsisoq Katharina Qvist aamma nuannaaqaaq qiimmatsaatiginarlunilu – minnerunngitsumik aamma nunaqarfimmut, periarfissinneqarluni ilinniartitsinissamut.
”Agiarsinnaaneq aamma nipilersorneq inuuninnut ilaasorujussuusoq qujamasuutigisaqaaralu periarfissinneqarsimagama alliartorninnut agiaq ilaalluinnarsimammat. Taamaattumik kissaatigisarsimavara meeqqanut inuusuttuaqqanullu periarfissiissutigissallugu agiassap ilinniartitsissutiginissaa,” Katharina Qvist oqaluttuarpoq.
Nunaqarfimmi sumi ilinniartitsissanerluni misissuigami atoqqarsimavaa Kullorsuaq.
”Birgitta-p ilisimaneqaatigaa pilersaarutit taamatut ittut iluatsittarneri. Neriuppunga atuartut uattulli agiaq nuannaralugulu imminnut saqqummiussinnaalissasut siunissami qanittumi, ” Katharina Qvist oqarpoq.
Iluatsilluartutu isikkoqarpoq. Maannakkorsiaq meeqqat 20-it ilinniartinneqarput meeqqanillu allanik ilinniarusuttunik utaqqisoqarluni.
Qarasaasiakkut agiarnermik ilinniartitsineq - aamma Uummannamiik
Ukioq atuarfiusoq una Kullorsuaq ornillugu ilinniartitsivigineqarpoq. Aasaanerani atuanngiffeqarnerup kingorna 2023-imi ilinniartitsineq aamma qarasaasiatigut ingerlanneqalissooq.
”Agiarnermik ilinniarsimasunik sungiusimasalinnik inoqarfiit tamarmik peqarsinnaanngillat, taamaattumik allatulaaq qarasaasiatigut ilinniartitsinerit ineriartortippagut,” taama oqaluttuarpoq Hanne Saandvig Immanuelsen, Nunatta agiartartoqatigiivi-. niik
Agiartartoqatigiit peqatigiiffiat aamma pilersaarusiortarpoq, qarasaasiakkut atuartut ornigullutik peqataanissaannut. Soorlu Nuummi juullimut takutitsisoqaqqammivoq, makkunanngaanniik peqataaffigineqartumik, Nuuk, Maniitsoq, Sisimiut kiisalu Kangerlussuaq.
