Ilaqutaasoq toqukkut qimagutsillugu imaannaanngitsunik suliassaqartarpoq. Pingaartumik toqukkut qimagussimasoq nunami sumiiffimmi allami ilisaasussaatillugu, imaluunniit toqukkut qimagussimasoq Danmarkip Kalaallillu Nunaata akornanni angallanniarneqartillugu. Toqukkut qimaguttumik angerlamut angallassineq pillugu malittarisassat matumani atuarsinnaavatit.
Toqukkut qimaguttumik angerlamut angallassineq
Inuit peqqinnissaqarfiup oqartussaaffigisaanik katsorsartinnermik nalaanni toqukkut qimaguttut katsorsartittutut oqariartaatsimut ilaanngillat. Peqqissutsimut inatsit naapertorlugu inuup toqukkut qimaguttup illoqarfianut imaluunniit qimagaasut kissaataat malillugu sumiiffimmut ilineqarnissaanut angallanneqarnissaanut atatillugu aningaasartuutit peqqinnissaqarfimmit matussuseqarneqarneq ajorput.
Taamaattoq inuk katsorsartinnerup Kalaallit Nunaanni peqqinnissaqarfimmit aallartinneqarlunilu aningaasalersorneqartup nalaani, angerlarsimaffigisap avataani toqukkut qimagukkaangat ilaqutaasunut qimagaasunut imaluunniit kingornussisussanut aningaasanik peqqinnissaqarfiup akiliuteqartarnera ileqquuvoq.
Aningaasat nalinginnaasumik billet-ip angeqqatigisarpai ilaasumut issiasumut atorneqartartut, illoqarfigisamut nunaqarfigisamulluunniit toqukkut qimaguttup inuttut allattorsimaffimmi angerlarsimaffigisaanut.
Aningaasanik tunniussineq taamaallaat pisinnaavoq qarasaasiakkut e-maili atorlugu allakkanik piumasaqaatinik nassiussinikkut uunga sundhedsledelsen@peqqik.gl.
Umiarsuakkut timmisartukkkulluunniit angallassineq
Umiarsuakkut timmisartukkullu angallassinermi toqukkut qimagussimasoq angallassinermut ingerlatseqatigiiffiit malittarisassaat atuuttut naapertorlugit angallanneqartassapput. Nunat allat (Danmarki ilanngullugu) Kalaallit Nunaatalu akornanni angallassinissamut illerfimmik zinkiusumik atuititsisoqartassaaq.
Umiarsuakkut angallassisarneq timmisartukkut angallassisarnermit akikinnerusarpoq, kisiannili umiarsuakkut angallassisarneq sivisunerusarluni.
Toqukkut qimagussimasut angallanneqarnerinut akit Air Greenlandimut imaluunniit Royal Arctic Linemut paasiniaaffigineqarsinnaapput. Toqukkut qimagussimasup angallanneqarneranut aningaasartuutit ilaqutaasuni akilerneqartussaapput.
Illerfiit zinkit
Kalaallit Nunaannit
Kalaallit Nunaata iluani angallassinissamut aamma Kalaallit Nunaata Danmarkillu akornanni angallassinissamut illerfinnik zinkinik atuinissamut piumasaqaateqanngilaq.
Nunani allani
Ilaqutaasut qimagaasut imaluunniit kommunerisaq namminneerlutik najukkami ilisinermik suliaqartumut illerfimmik zinkimik angallassinissaq aamma akissaa pillugu isumaqatigiissusiussapput
Timimik ikuallaaneq aamma arsakut puuat
Inuk nunani allani (Danmark ilanngullugu) toqukkut qimagussimappat, timimik ikuallaanissamut periarfissaqarpoq. Tamatuma kingorna ikuallatap arsaasa puuat ilaqutaasunit ilisiffissamut assartorneqassaaq imaluunniit Kalaallit Nunaanni nassiussiffigineqaqqusamut nassiunneqarsinnaalluni.