Nalinginnaasumik tassaapput illoqarfiit nunaqarfiillu ingerlalluartut, innuttaasut arlalitsigut annertuunik isertitaqarlutik.
Tamannalu piffinni tamani ajornerulissanngitsoq inatsisissap qulakkeertariaqarpaa, massakkulli inatsissatut siunnersuut killormut innuttaasutsinnut kommunimullu sunniuteqartussaavoq.
Allannguinissaq taamatut isikkoqartillugu akuersaarneqarsinnaanngilaq.
Aalisartut sulisartullu aningaasarsiorluarlutik ingerlasut ajornerusumik atungaqalernissaat akuerinngilarput aamma akuersaarsinnaanngilarput.
Avannaata Kommunia aalisartoqarfissuuvoq immikkullu qaleralinniarneq taaneqartariaqarluni. Kommunimi sumiiffinni amerlanerpaani qaleralinniarneq inuutissarsiutit pingaarnerpaattut ingerlanneqarpoq, taamaattumik inatsisissamik allannguinissaq eqqarsaatingilluakkamik suliarineqartariaqarpoq.
Aalisarnermut Naalakkersuisup inatsisip allanngortinnissaanut siunnersuutaa tusarniutingineqarmat Avannaata Kommuniani kommunalbestyrelsi akissuteqarsimavoq massakkullu Inatsisartuni siulleqqaammut oqallisingineqarnissaanut akerliunerminut erseqqissaateqarumavoq.
Avannaata Kommuniani kommunalbestyrelsi inatsisip taama isikkoqartillungu allanngortinneqarnissaa akuersaanngilluinnarpaa.
Siullermik inuiaqatingiinnut tusarniutingineqarnera allannguinissamilu inuiaqatingiinnut sunniutaasinnaasut pittaasumik ersarissumillu nassuiarneqanngillat.
Kommunerput aalisartoqarfissuuvoq allannguinerlu aningaasarsiornikkut suliffeqartitsinikkullu annertuumik eqqorneqarsinnaapput assersuutingalungu tulaassisussaatitaaneq annikillilerniarneqarpoq, suliffissuarni sulisut ikilisarneqarnissaat takutinneqanngilaq ersarissumillu oqartussaasunit nalunaarutingineqarani.
Tamanna isumaalukulunnarpoq innuttaasut amerlasuut kommunitsinni suliffissuarni sulisuupput tassuunakkullu aningaasaqarnikkut imminnut napatipput.
Aappaattut ullumikkut qaleralinniarlutik angallatit mikinerusut paggatassinneqartartut pisassaqalerlutik ikaarsaarsinnaanerat aqqutissiunneqarumavoq.
Aalisartorpassuit paggatassiinermi inuutissarsiuteqartut siunnersuummi ersarissarneqanngilaq amerlassusaat nikisinneqassanngittoq, avaqqunneqarsinnaanngilaq pisassat ikinnerulissappata aalisartukillisaanissaq ingerlanneqassasoq, tassanilu ersarissunik paasissutissanik saqqummiisoqanngilaq.
Pisassat niuerutingineqarnerani qanoq ililluni kommunitsinni aalisartut ikorfartorneqarnissaat ersersinneqanngilaq.
Ullumikkut aalisartut bankini aningaasanik attartorsinnaanerat ajornakusoortupilussuuvoq allannguinermilu aalisartut periarfissaat ersarissarneqarani.
Taamatut aaqqiinermi qularnanngittumik aalisartut aningaasaateqarfinnut pituttorneqassapput nalinginnaasumillu ulluinnarni kiffaanngissuseqarlutik inuunerat innarlerneqassalluni.
Tamanna kommunalbestyrelsi isumaqarpoq eqqarsarnartoqartoq, allatut oqaatingalungu allaanngilaq aningaasaateqarfinnut pisassanik aqutsineq tunniunniarneqartoq.
Inuiaqatigiinnut aalisartut akileraarutitigut annertuumik tapertaanerat suli annertunerulersinniarlugu inatsisissaq aaqqinneqartariaqarpoq massakkulli kommunimut aalisartunut sulisartunullu ajornerulersitsisussaq akuersaanngilluinnarparput!
Inatsisissami aalisartut "aalisarluanngitsutut" taaneqartut aalisarnermiit peernissaat oqariartuutaavoq aamma sulisartut tunisassiorfinni allaat inuit 100 siinerlugit taakkartorneqarput suliunnaassasut, uagullu kommunerput eqqungaanerpaasussaavoq kommunerput aalisartoqarfissuummat.
Ajornerulersitsiniarluni suliaq akuersaanngilluinnarparput.
Nunaqarfinni illoqarfinnilu aalisarneq inuussutissarsiutit pingaarnersarivaat ilaatigullu allamik periarfissaqarnani, massakkutut aaqqissuussaanerput tunngavigalugu, taamaattumik aalisartut aalisartuujunnaassappata imaaliallaannarlugit suliffimmut allamut nuutinneqarsinnaanngillat.
Kommunalbestyrelsi-p inatsisissatut siunnersuut taama isikkoqartillugu akuersaarsinnaanngilluinnarpaa aamma IOK taama isikkoqartillugu tamakkiisumik akuerisinnaanngilarput.
Tassani aalisartut akissallit kisimik periarfissinneqartussaammata, tamatumalu kingunerisaanik umiatsiaararsortut bank-imiit ikiorserneqarsinnaanngereersut suli ajornermik inissinneqassammata.
Aamma akuerinngilarput aalisartut sulisartullu aalisarnermut tunngasunik suliassaarunnissaat – nunamut tulaassisussaatitaanerup annikillisinneqarneratigut.
Tunisassiorfiit qularnanngitsumik nunaqarfinniittut matuneqarsinnaanerat akuerineqarsinnaanngilluinnarpoq (G 60-ip politik-kia) nunaqarfinnik inuerusaaneq nangeqqinneqartussatut inatsisissap kingunerisinnaammagu.
Inatsississatut siunnersuut taama isikkoqarluni akuerineqassangaluarpat, pingaartumik Avannaata kommuniata akileraarutitingut annaasassai nalunaarusiortitsinitsinni takuarput aalisartuniit isertitassaraluagut imaannaanngittorujussarmik ikileriartussaammata.
Massakkut kommunimut aalisartut akileraarutaat 60 millionit missaaniipput taakkualu annikillerujussuarnissaanik inatsissaq kinguneqartitsisinnaavoq. Kommunip innuttaasullu annaasassai sukumiisumik qulajaqqaarneqartariaqarput inatsimmik akuersisoqannginnerani.
Inuttut kiffaanngissuseqarluni inuuneq aalisartut inuttut kinaassuseraat kultureralugu taannaannarluunniit qiviaraanni inatsisissap inuttut sunniutissai ajornerpaamik innuttaasutsinnut tuttussaapput imatut oqaatigalugu inuit massakkut ingerlalluartut inuiaqatigiinnullu aalisarnermikkut tapertaalluartut nunamut qaqitinniarneqarput inuttut kinaassusiarlugit suliffissaarutinniarlugit.
Tupinnassaqaaq kalaallip inooriaasia inuttullu tunngavia aningaasaq kisiat qiviarlugu taamatut inatsissaq siunnerfilik akuerineqarsinnaassappat.
Neriuppunga inatsisartuni ilaasortat sukumiisumik inatsisissaq iternga tikillugu iserfigilluarlugu qulaajarumaaraat aalijangiinginnerminnilu oqariartuutigut tusaallugit eqqarsaatigilluarumaaraat.