Kalaallit Nunaanni suliffeqarfiit pisortanit namminersortunillu ingerlanneqarput. Namminersortut pisortallu suliffeqarfiutaanni sulinermut atatillugu pissutsit inatsisit aqqutigalugit naleqqussagaapput. Tamatuma saniatigut pisortani atorfeqartunut atorfinitsinneqarnermi atugassarititaasut isumaqatigiissummi sulisut ataasiakkaat atorfinitsinneqarneranni malinneqartuni aamma maleruagassiorneqarput. Matuma kinguliani allassimasut pisortat suliassaqarfiannut taamaallaat tunngatinneqarput.
Katissimasat imaluunniit inooqatigisat pisortani atorfeqartilluni toqukkut qimaguppat, qimagaasutut pisinnaatitaaffigaatit:
- Kingornagut isertitat
- Sulinermut atatillugu inigisaq aamma pequtit nassiunneri
- Atorfimmiit suliunnaarnermi angalaneq
- Illerfiup angallanneqarnera
Qimagaasut tamarmik assigiimmik pisinnaatitaaffeqanngillat. Katissimasavit imaluunniit inooqatigisavit toqukkut qimaguttup atorfeqarnermini isumaqatigiissutaa aamma atorfeqarnerminut atugassarititaasunit pisinnaatitaaffitit aalajangersarneqarput.
Pisortani atorfeqartunit toqukkut qimagaasut kingornagut isertitaqarnissamut pisinnaatitaaffeqarsinnaapput. Tassa imaappoq, illit qimagaasutut toqukkut qimaguttup isertitai piffissami aalajangersimasumi pissarsiarisassavatit. Illit pisinnaatitaaffitit katissimasavit imaluunniit inooqatigisavit toqukkut qimaguttup isumaqatigiissutaanit aalajangersarneqarput.
Atorfillit pillugit inatsit naapertorlugu kingornagut isertitassanik pisinnaatitaaffeqarsinnaavutit – isumaqatigiissummi malittarisassatut aalajangersakkat sanitigut.
Assersuutigalugu atorfilik suliffeqarfimmi ukiumi ataatsimi imaluunniit marlunni pingasuniluunniit atorfeqarsimappat atorfeqarnermilu nalaani toqukkut qimaguppat, atorfeqartup katissimasaa imaluunniit qitornai 18-it inorlugit ukiullit atorfiliup pilersornissaannut pisussaaffeqarfigisai, qaammatini ataatsimi, marlunni pingasuniluunniit akissarsiaasa nalinginik pisinnaatitaapput.
Malittarisassat tullinnguuttut AK-nut aamma SIK-nut atuupput. Toqukkut qimaguttoq isumaqatigiissut alla malillugu atorfeqarsimappat, illit qimagaasutut isumaqatigiissut eqqortoq misissussavat ilaatigut pisinnaatitaaffitit paasiniarlugit.
AK-mi tjenestemanditut atorfeqartunut kingornagut isertitat
Tjenestemandimut atorfeqarnermini imaluunniit soraarnerussutisiaqarnermini toqukkut qimaguttumut qimagaasut kingornagut isertitanik pisinnaatitaapput.
Kingornagut isertitat qimagaasup katissimasaanut tunniunneqassapput. Toqukkut qimaguttoq katissimasaqanngikkuni, qitornanilli soraarnerussutisiaqarsinnaatitaasunik qimataqaruni, taakku kingornagut isertaanik pisussaatitaapput. Toqukkut qimaguttoq katissimasamik qitornanilluunniit soraarnerussutisiaqarsinnaatitaasunik qimataqanngikkuni, toqukkut qimaguttup qimatai kingornagut isertitaqarsinnaatitaapput.
Toqukkut qimaguttoqareernerup kingorna qimagaasut aallaaviatigut qaammatini pingasuni kingornagut isertitaqarsinnaatitaapput. Matumani malittarisassat tulliuttut atuupput:
- Toqukkut qimaguttoq sulinermi kingunerisaanik toqukkut qimagussimappat, qimagaasut qaammatini aqqaneq-marlunni kingornagut isertitaqarsinnaatitaapput
- Toqukkut qimaguttoq katissimasaata katissimalluni ataatsimut soraarnerussutisiat pisinnaatitaaffigineri sioqqullugit toqukkut qimagussimappat, qimagaasoq katissimasaq qaammatini qulingiluani kingornagut isertitaqarsinnaatitaavoq
SIK-mi ilaasortat kingornagut isertitaat
Malittarisassat tullinnguuttut meeqqerisunut isumaginninnermilu ikiortinut qimagaasunut atuupput.
Qimagaasut kingornagut isertitaqarnissamut pisinnaatitaassappata:
- Toqukkut qimaguttoq toqukkut qimagunnermini pisortani atorfeqartuussaaq
- Toqukkut qimaguttoq suliffeqarfimmi sivikinnerpaamik ukiumi ataatsimi sulisimassaaq
Qimagaasut kingornagut qanoq sivisutigisumik isertitaqarsinnaatitaanerat toqukkut qimaguttup toqussani sioqqullugu qanoq sivisutigisumik atorfeqarsimanera apeqqutaavoq:
- Toqukkut qimaguttoq ukioq ataaseq atorfeqarsimappat, qaammammi ataatsimi akissarsiat nalinginik pisinnaatitaavutit
- Toqukkut qimaguttoq ukiut marluk atorfeqarsimappat, qaammatini marlunni akissarsiat nalinginik pisinnaatitaavutit
- Toqukkut qimaguttoq ukiut pingasut atorfeqarsimappat, qaammatini pingasuni akissarsiat nalinginik pisinnaatitaavutit
Kingornagut isertitat uunga tunniunneqassapput:
- Toqukkut qimaguttup katissimasaanut imaluunniit inooqatigisaanut
- Imaluunniit toqukkut qimaguttup qitornaanut 18-it inorlugit ukiulinnut pilersuiffiginissaanut pisussaaffigisaminit
Pisortani aalajangersimasumik atorfillit ilaat sulinerminnut atatillugu inigisaqarsinnaapput, tassani atorfiisa allagarsiunneqarneri apeqqutaapput. Sulinermut atatillugu inigisaqarneq tassaavoq atorfinni sulinerninnit inigisatut najussallugu pisinnaatitaanerit. Tamannalu ima isumaqarpoq, suliffimmut atatillugu inigisaq toqukkut qimagukkaanni aamma qimanneqassaaq.
Katissimasavit imaluunniit inooqatigisavit toqukkut qimagunnerata kinguneranik suliffimmut atatillugu inigisamit allamut nuuttariaqaleruit, pequtivit nuunnerinut akilertinnissaanut pisinnaatitaaffeqarputit. Akilertinnissaanut pisinnaatitaaffeqaruit, taava katissimasavit imaluunniit inooqatigisimasavit toqukkut qimaguttup suliffeqarfiata akilissavai.
Qimagaasut tamarmik assigiimmik pisinnaatitaaffeqanngillat. Pisinnaatitaaffitit katissimasavit toqukkut qimaguttup isumaqatigiissutigisai najoqqutaralugit aalajangersarneqarput.
Malittarisassat tulliuttut AK-mi tjenestemanditut atorfeqartunut qimagaasunut atuupput.
Sulinermut atatillugu inigisaq
Katissimasavit imaluunniit inooqatigisavit toqukkut qimaguttup sulinerminut atatillugu inigisaani najugaqaruit, qaammatip naanera tullialu tamaat ilanngullugit najugariinnarnissaanut pisinnaatitaaffeqarputit.
Katissimasat imaluunniit inooqatigisat oktobarip ulluisa 18-ianni toqukkut qimaguppat, novembarip qaammataata naanera ilanngullugu sulinermut atatillugu inigisami najugaqarnissannut pisinnaatitaaffeqarputit.
Pequtit nuunneri
Pequtit qanoq annertutigisut nuunneqarnissaannut akilertissinnaaneritit matumani apeqqutaavoq:
- Sulinermut atatillugu inigisaq pequsersugaanersoq – tassa imaappoq, illit pequtigineritit imaluunniit inissiaatileqatigiiffiup pequtaatiginerai
- Meeqqat ilinni najugaqartut qanoq amerlatiginersut
Katissimasat imaluunniit inooqatigisat toqukkut qimagunnerani nuuttariaqaleruit, atorfimmit suliunnaarnermut atatillugu toqukkut qimaguttup suliffeqarfiata akiligaanik angalanissamut pisinnaatitaaffeqarputit.
Angalaneq ilinnut meeraqaruillu meeqqannut 18-it inorlugit ukiulinnut atuuppoq, angalaffissarlu tassaavoq toqukkut qimaguttup atorfittaarnermini aallarfianiit angalaneq pissaaq.
Pisut ilaanni toqukkut qimaguttup suliffeqarfiata toqukkut qimaguttup Kalaallit Nunaanni imaluunniit Danmarkimi atorfininnermini suminngaanneerfianut illerfiup angallannissaa akilersinnaavaa.
Katissimasat imaluunniit inooqatigisat assersuutigalugu Ilulissanit Qaqortumut atorfeqariartorluni nuussimappat, Ilulissanut uternissaanut illerfiup angallanneqarnissaa suliffeqarfiup akilersinnaavaa. Toqukkulli qimaguttoq atorfittaarnermini Qaqortumi najugaqareersuuppat, Ilulissanut illerfiup angallannissaa suliffeqarfiup akilissanngilaa – aamma naak toqukkut qimaguttoq Ilulissani ilisaasussanngoraluarpat.
Illerfik aallaaviatigut umiarsuakkut angallanneqassaaq. Tamanna ajornarpat illerfik timmisartukkut angallanneqassaaq.